I laureati di u premiu di u libru corsu 2021
2021-09-17 11:44:26

A  ghjuria di u premiu di u libru corsu addunita in Corti hà designatu i laureati per l’annata 2021. I premiati sò, in a categuria finzione in francese “Elle a menti pour les ailes” di Francesca Serra, in a categuria lingua corsa u libru “A l’alba di u cantu”  di Ghjilormu Padovani, è in a categuria prova “L’adieu aux aspirations nationales” di Kevin Petroni.

In l'antolugia ' A l'alba di u cantu', Ghjilormu Padovani, giurnalistu à Corse-Matin, hè andatu à scuntrà autori, cumpunidori. Ci truverete a storia di a nascita o di u successu di 130 canzone. Sta racolta antologica hè à tempu una storia di a canzona corsa in generale è una racolta di storie da scopre. 

Pè u so primu rumanzu “Elle a menti pour les ailes”, a scrittrice aiaccina Francesca Serra tratta di a sparizione di Garance Sollogoub, favurita d'un cuncorsu di manicchini. Un dramu in leia cù e rete suciale.

“L’adieu aux aspirations nationales” di Kevin Petroni. À solu 27 anni, st'universitariu bastiacciu hà publicatu un libru di prima trinca nant'à a sucetà corsa. L'autore vole mustrà chì u sintimentu di crisa permette à a ghjente di fassila valè.