Spusizione Aldilà à u museu d'Aleria
2021-10-12 16:36:56

Sta spusizione splora l’aldilà ind’un percorsu ingiru à sepulture antiche. Da l’Etruschi à i Rumani, tutti st’ogetti ritrovi ind’i campi santi vicin’à Aleria ci insegnanu cumu i nostri antichi accumpagnavanu i morti pè u so ultimu viaghju. Si puderà vede in particulare a ricustituzione di a famosa « Tomba 90 » scuperta una cinquantina d’anni fà ind’u campu santu etruscu di Casabianda. E 178 altre sepulture - datate trà u VIu è u IIIu seculu nanz’à a nostra epuca – cuntenenu dinù ceramiche greche assai fine chì facenu pensà à a presenza di i Grechi in Corsica. "Si sà chì ci sò influenze diverse. Ind’una listessa tomba, avemu à tempu elementi venendu da Grecia, d'Etruria (Toscana attuale), d'Africa di u Nordu è da u mondu punicu", spiecava l'archeologu Jean-Michel Bontempi in u 2018. 

Appena più luntana, una sala hè u locu di u simposiu, vale à dì un rituale di cunsumazione di vinu induve si vede una pruduzzione diviziosa di ceramiche in e sepulture etrusche. "E beiende sò servute in elementi chì si ritrova in e tombe, pruviste alimentare sò dinù spartute postu chì avemu in e tombe brasgere à carne è coppe chì servianu pè l’offerte", hà dettu Julia Tristani, direttrice di u museu d'Aleria.

Classificatu frà i Monumenti storichi, stu campu santu cuntene unu di l’insemi funerari etruschi i più ricchi cunnisciuti fora d’Italia. Una parte di a mubiglia rimarchevule raccolta (4510 ogetti, frà quessi 345 vasi attichi, attrazzature militare di guerrieri etruschi…) hè in u museu di situ d’Aleria. In Aldila, si trattava dinù di presentà à u publicu l’ogetti scuperti in u 2019 ind’u campu santu di Lamaghjone. Un cantieru chì hà permessu di scopre un situ anticu è una tomba etrusca sottuterra, ghjuvendu di regula à persunagi d’alta mola. 

Da a cità di i morti à u campu santu, versu a so sepultura sottuterra, è infine versu l’Aldilà, ogni camera hè guarnita di vasi, buccette o ghjuvelli scuperti durante cantieri di scavi archeologichi. "St’ogetti ci permettenu di parlà pè u più di l’attributi feminili, in particulare i ghjuvelli, d'accumpagnamentu di a salma in u so locu di riposu », spieca dinù Julia Tristani. A ricchezza di l’ogetti dipende da u statutu di a famiglia di u mortu. Pitture ornanu ogni tantu i muri.