Creazione di Aiò TV
2021-10-30 14:44:14

Aiò TV sbarca in u 2022 nant’à internet !

Novu media in u mondu di u ghjurnalisimu isulanu è masimu l’audiuvisivu, Aiò TV hè stata prisintata in i so scagni di Mezavia. A struttura vole marcà una rumpitura cù ciò si face altrò in Corsica, per pone a so grinfia intornu à a spartera è a vicinanza…

À l’iniziu, ci era un prughjettu. Quellu di Patrick Vallerent, respunsevule di l’usteria « U San Gabriellu » in Aiacciu è cunnisciutu sopratuttu per avè participatatu à u percorsu di u gruppu « Fratellanza ». Qualchì tempu fà, issu passiunatu di cultura è di musica, hà l’idea di creà una struttura dedicata à a Televisiò. Un prughjettu tamantu. « Mi piacenu e scumesse, spiega u capimachja di a futura struttura, mi so dettu « Perchè micca ? » è aghju principiatu l’affare. Era una spezia di cuntinuità di u me percorsu... »

Un prughjettu d’ottu mesi

Patrick Vallerent s’arremba nantu à u so passatu zitellinu per cuncepisce, à pocu à pocu, u so prughjettu. « Pensu chè a Televisò ughjinca manca di vicinanza. Ci vole à adunisce di più la ghjente intornu à a spartera è cumunicazione. Hè in issu sensu quì ch’aghju vulsutu travaglià. »

U respunsevule scrive e so idee nantu un pezzu di carta è cummencia à sviluppà u so prughjettu. Ma solu, ùn era pussibule. Tandu, s’acconcia cù qualchì persona, passiunata cum’è ellu è à tempu cumpetente per mette tuttu in piazza.

Hè, dopu à ottu mesi di travagliu, impegnu è ricerche, st’inseme quì chè Patrick Vallerent è a so squadra anu prisintatu in i so scagni di Mezavia. Una struttura chì si sparghje in 600 m² induve truvemu, di sicuru, technichi ma soprattu animatori è ghjurnalisti. « Avemu fattu issu prughjettu à modu nostru arrimbatu à u mondu assuciativu ch’ùn hà micca abbastanza a parolla. »


Cuntà a Corsica

Cù « Aiò TV », si tratterà di tuttu, da a cultura à a cucina passendu per a moda, l’arte o a storia. « Fà mi sunnià », « Campu azzione », « a magia di i sensi », « arte maiò », disegni vivi, eccu qualchì emissione appruntate da l’animatori : Laetitia Kotcheff, Chloé Pelluet, Michel Rosecchi, Francesca Antoniotti, Jean-Laurent Marcia... Ilhem Pietri ne hè a capiredattrice. « Per noi, l’idea hè di cuntà a Corsica cù a messa in vale di tuttu ciò ch’ella t’hà di megliu. » aghjusta u capimachja, ci seranu, di sicuru, emissione in lingua corsa. »

Un prughjettu d’una imbusca maiò cù, quantunque 26 impiegati. Ma Patrick Vallerent ùn si vole micca piantà quì.


Un ponte culturale cù l’Africa è Dubaï

Un ponte hè statu creatu cù Dubaï è u Tchad per diffusà l’emissione quallà ma micca solu. « Avemu fattu un partenariatu cù « 24 karat », struttura audiuvisiva di Dubaï. U scopu, quallà è in Africa, hè di pudè favurizà scambii culturali. Dopu, avemu dà creà trè accademie per furmà ghjovani di Corsica è di quallà à i mistieri di l’audiuvisivu. Hè dinò una scumessa ma l’aghju vulsutu cusì. »

Per ciò chì tocca à l’aspettu finanziariu, Aiò TV pruponerà abunnamenti diversi (4,99 € u mese) nantu à u so situ aiotv.fr chì serà prontu da quì à qualchì mese.

Un prughjettu monda aspettatu…

Ph.P.