33e Musicale di Bastia
2021-11-04 09:54:24

E 33e Musicale di Bastia sò previste i 14, 19, 20 è 21 di nuvembre. In st’occasione, u so presidente Raoul Locatelli festighjerà i so 50 anni di vita bastiaccia. A 24 anni, Bastia hè statu u so primu postu di prufessore di filosufia è ci hà fattu u so percorsu prufessiunale sanu. Tempu ghjuntu in cità, hà cercatu à aderì à un associu culturale. Ghjè statu “Arts et Essai” di René VialeIn u 1975, hà creatu u so associu di puesia è di cantu. Dopu à a stonda di ricordu è d’emuzione, a stonda musicale. In u 2021, u festivale di e musicale s’internaziunalizeghja. A prugrammazione 2021 hà invitatu i paesi di l’Este è Balkans cu a fanfara Tziganissa, l’Andalusia cù Paloma Pradal, l’Africa cù Amadou et Mariam, u jazz è soul americani cù Robin Mckelle (d’origine irlandese), a Corsica cù i gruppi EppoSoledonna è Fabienne Marcangeli, u viulinu di Bertrand Cervera di l’Orchestru Naziunale di Francia, a musica sacra cù a mezzo-soprano Claire Cervera, un omagiu à Boris Vian cù Le Quartet moins 1.

U filu cunduttore di u festivale serà u ghjuculadore Vincent De Lavenere chì mustrerà u so arte nanzu è dopu i cuncerti è i spettaculi pè i giovani è animazione. Ci serà Lilanimo pè e classe materne, “Carnettu di Viaghju” di Anaïs Gaggeri è Emmanuelle Marini pè e classe elementarie. I cullegianti è licenai seranu in l’universu di Django Reinhardt, u rè di a chitarra manouche, cù u “Jean-Jacques Gristi Trio”. In più di e so ghjuculere musicale, Vincent De Laverne ci ferà scopre à Guiraut de Calenson, un troubadour occitanu di u XIIIu seculu spettaculu “Le fabuleux voyage de Guiraut de Calenson”.

Infurmazione-riservazione : https://www.musicales-de-bastia.com/