Vogliu, u novu dischettu di u gruppu Erin
2022-01-06 18:16:18

Un ventu di rinnovu creativu pare suffià nant’à a scena musicale isulana. Dopu à u dischettu di u gruppu bastiacciu Eppo in un stile pop folk, ghjè u gruppu Aiaccinu Erin chì hà esciutu un novu dischettu in lingua nustrale ispiratu di u rock di l’anni 70-80. Dopu à dui dischetti arrigistrati trà u 2007 è u 2009 cù cuncerti, Denis Buffignani è Paul Valot parianu avè interrottu l’attività di a so furmazione. Ma ci era a brama di ricullà nant’à a scena è un’indiatura sempre viva malgradu l’anni chì passanu. 11 anni dopu à “Sempre più chè tè”, Erin prupone u dischettu “Vogliu” cù e so ondeci creazione studio. I so testi sò indiati pè annunzià una brama d’emancipassi in a vita d’ogni ghjornu ma dinù cum’è populu corsu. Una rivindicazione di a nostra identità, a nostra lingua, a nostra cultura. A canzona-titulu di u dischettu rimanda à un omagiu à a Bandera, à quelli chì anu persu a vita pè a so isula è à i prigiuneri pulitichi. Sò inseriti in particulare discorsi di i dui FLNC. Avemu dinù voce zitelline chì riprisentanu a Corsica di dumane. Ci hè una simbolica cù una bandera posta in u scogliu induv’ella s’arradicheghja nanzu di trasfurmassi in fiore chì s’apre à u ventu è chì l’amacu si sparghje in millaie di bandere ricuperate da i zitelli durante a so marchja identitaria pè affirmà a so identità.

Musicalmente, Paul Valot è Denis Buffignani trovanu l’estru ind’è Led Zeppelin, Deep Purple, Iron Maiden è AC/DC, senza scurdassi di l’influenza irlandese d’un Gary Moore o Rory gallagher. U titulu Erin (Irlanda in gaelicu) rimanda à a canzona Surella d’Irlanda di  Canta u Populu Corsu. D’altrò, Sabine Casanova face oramai parte di u gruppu. Philippe Bresson ripiglia u batteriu è Théo Sorbara hè l’ingegneru di u sonu. Raphaël Rousseau sona l’harmonica pè dà u culore di a cità americana di Nashville, grande centru di l’industria di u discu è ci hè Pierre Barthélémy pè a creazione finale di u dischettu. Oramai, u scopu di u gruppu Erin hè di presentà u dischettu in live. Da quì à tandu, Paul Valot è Denis Buffignani cuntinueghjanu à traccià a so strada à l’antica.