E Cardelline : 40 anni
2022-01-08 11:42:39

Quarant'anni fà, Dumè Gambini addunia zitelli è, cun elli, pruducia u discu Libertà fermatu in e memorie. Ghjera u tempu d’una scola ch’ùn era ancu bislingua ma si parlava digià in corsu è francese in e sale di classa è durante e surtite ind’a natura. Ghjera u tempu di l’associ di Corti, incarnati da l’associu A Rinascita, induve i zitelli di a cita paolina cantavanu, ghjucavanu, scuprianu u so patrimoniu, amparavanu a so cultura. Ghjera l'età d'oru di u Parcu naturale regiunale chì prutegia digià l’animali salvatichi in periculu. Ghjera soprattuttu l’epuca mitica di u Riacquistu. In quant’à E Cardelline, era u primu gruppu di zitelli cantendu nant’à a scena, stallatu nant’à i studio d’arrigistramentu è partutu nant’à e scene cuntinentale. A canzona hà traversatu u Mediterraniu cù i so canterini isulani è hè stata dinù tradutta in brittonu. Oghje ghjornu, l’arnese numericu dà à a canzona Libertà più d’un milione di viste. U so successu si spieca per via di a simplicità di e so parolle ma chì sò sempre in l’attualità è purtate da una vera meludia.

In stu filu, una nova generazione seguita listessa andatura. “Dapoi assai tempu, femu canzone micca per i zitelli ma cù i zitelli”. Sò meludie zitelline ma cù temi d’adulti in leia cù l’attualità è e grande prublematiche di a nostra sucetà. Canzone create in l’APALC (attelli di pratica artistica in lingua corsa) in usu dapoi qualchì annu da a CDC. A creazione d’una canzona hè un prucedimentu chì funziuneghja secondu tappe immaginate da Dumè Gambini.

Oramai, a quistione hè di sapè cumu fà di st’opera ? Cumu valurizà e creazione di i zitelli aldilà di u spettaculu di fine d’annu di scola  ? Per quessa, dopu à u successu di a “Lettera da u Burkina” cù i sculari di Marie-Madeleine Menozzi, chì hè stata messa in u dischettu “Pianeta” di I Muvrini, si spera dinù un altru successu cù u novu dischettu “Mente in core pè dumane”. In stu dischettu, avemu canzone anziane è nove chì rimandanu à un temu o à un sugettu in leia cù a sulidarità, u rispettu, l’ecolugia, u fraiutu… Un’opera in u quadru d’una pedagugia cuuperativa. Anu arrigistratu in una ghjurnata cinque anni di creazione cù i zitelli di a scola bislingua.