Forni à anfore antiche scuperti in Aleria
2022-11-08 16:07:01

Forni à anfore, di u primu seculu dopu à Cristu, sò stati scuperti nant’à a cumuna d’Aleria. Una scuperta maiò chì hà da permette di sapenne di più nant’à u sistemu ecunomicu di a Corsica à st’epuca rumana. Quasi duiemil’anni fà, Aleria risplendia in Mediterraniu. Ne testimunieghjanu e vistiche rumaniche è etrusche di u situ anticu scuperte regularmente dapoi più di cinquant’anni. Ma Aleria ùn si limiteghja solu à u forte è à u so circondu. Pare ch’ellu si sparti nant’à parechji chilometri. L’ultima scuperta archeologica hè impurtante. L’archeologu Gaël Brkojewitsch spieca ch’elli anu scupertu un fornu à pignula in un stabilimentu rurale, una tenuta o una villa rumana, chì data di l’Altu Imperu, di u primu seculu nanz’à Cristu. I cercadori ùn s’aspettavanu à una scuperta simule. Si sà chì sò numerose l’anfore in Corsica, ghjè d’altronde a scuperta a più frequente è chì aiuta à precisà a data di fabricazione ma ùn sapianu ch’elle eranu fabricate in l’isula. 

A pocu à pocu chì e piole cacciavanu i sedimenti è chì e spazzole cacciavanu l’ultime pulvericce sott’à i gesti precisi di l’archeologhi, u situ di scavu palisava i so secreti sin’à un veru attellu di pignulaghju. Fora di u fornu, ci si trova fosse permettendu di caccià terra rossa, vasche di ricolu pè fabricà i vasi. Avemu dinù vistiche d’un fornu di pignula è dui forni di pignulaghju. Dunque, una scuperta maiò chì hà da permette di sapenne di più nant’à l’aspettu cummerciale d’una fabrica simule. Si pò studià tutta a reta ecunomica è a manera di diffusà sti vasi. Eranu empiuti d’olive, vinu o salsa è eranu fatti pè i viaghjoni. Sì tutti i secreti d’Aleria è di i so circondi ùn sò ancu cunnisciuti, si pò dì chì a zona è a piaghja orientale traboccanu di vistiche sempre sutterrate.