Pedicroce : a Guardia Corsa Papale si stalla in a cappella Santa Divota
2017-01-31 16:05:52

L'associu Guarda Corsa Papale, presidatu da Iviu Pasquali è creatu in u 2014 in cullaburazione cù l'ADECEC, si stalla in a cappella Santa Divota di Pedicroce. In st'anzianu oratoriu di e cunfraterne orezzinche, ci hè stata l'inaugurazione di a spusizione di l'associu cù a messa nustrale è parechje cunfraterne. U presidente s'hè rallegratu di sta stonda dicendu chì "Dopu parechji mesi d'impegnu, tuttu u scagnu di l'associu Guardia Corsa Papale hè felice di truvavvi à fiancu soiu, in issu locu sacru classatu monumentu storicu, fattu per esse un locu di scambii, d'amparera è di spartera". Hà ringraziatu tutte e persone chì anu participatu à a riabilitazione di a Storia, in particulare Fanfan Dal Coletto è i cunfratelli di San Ghjiseppu chì facenu un travagliu assignalatu in l'Arciconfraternità del Carmine di u Trastevere, in Roma.

Iviu Pasquali hà annunziatu chì a Madonna Fiumarola venerà in Pedicroce u 18 di marzu. Cù sta ghjunta, l'associu averà riesciutu a scumessa di riabilità ste guardie corse, avendu rinnuvatu leie cù u Vaticanu, Roma è u quartieru di Trastevere.

Rinsignamenti : 06 79 56 66 16 o guardia.corsa.papale@gmail.com