I Palazzi di l'Americani à u Museu di a Corsica
2017-08-04 10:05:05

E case di i Corsi Americani, chjamate i palazzi, sò ancu elle simbuli di u patrimoniu isulanu cù e citadelle, e torre di u litturale, e cappelle rumaniche è e chjese barocche. Da u 2007 à u 2012, studianti di Porto Rico sò ghjunti in Corsica pè fà i piani, i disegni di 78 case d'Americani di u Capicorsu. Eranu diretti da u prufessore Enrique Vivoni Farage, di u dipartimentu d’architettura di l’università di Porto Rico. Stu « Prugramma di studii in Corsica », sustenutu da l’università di Corsica, a cità di Bastia è l’Asociación de Corsos de Puerto Rico, hà permessu à sta squadra di rializà mudelli materiali è virtuali.

Sò state presentate durante una spusizione intitulata La casa de los Americanos à u Museo Antiguo Arsenal di a Marina Española, in a cità di San Juan (aostu 2016 – ghjennaghju 2017). L’università di Porto Rico è u prufessore Vivoni Farage anu rigalatu sti mudelli à a Corsica. Un donu chì hè statu l’occasione pè u museu di a Corsica, in Corti, d'addunì diversi ogetti simbolichi di a storia, di u destinu è a vita di sti Corsi partuti in paesi luntani è esotichi, cum'è Christophe Colomb è Amerigo Vespucci. Da scopre sin'à u 30 di dicembre di u 2017.