E cronache di Petru Mari
2017-08-09 11:13:10

Fujiyama a crisa

A Grezia, u Portugallu, a Spagna, l’Irlanda, l’Italia, a Francia è ancu l’Alemagna, l’Europa è u mondu sanu /ci sculisciavanu tutti. Ci sculisciavanu pianu pianu, /incù à le volti una certa classa, hè vera,/ ma ci sculisciavanu…

Induve ?

In a crisa. 

U G20 o 21 o 36/ avia asgiu à addunissi in Deauville, in Rimini, in a Costa Brava, o in u Kamchakà Suttanu, in hotel di lussu, moglie in affaccu, tualette studiate, media pianetarii scimiti, azzuffi à petrate, pruteste è benedizzioni. 

Crisa era è crisa si firmava.

Di fatti, i pulitichenti di i paesi ricchi facianu finta di guvernà un mondu, ammaestratu in a realità, da più ricchi chè elli.

Eccu chì ci eranu in pienu incù l’illusioni di i techji chi’ li si pare di guvernà. 

A temianu senza credeci, da poi ùn pezzu. Certi purtantu a cantavanu : «…simu siguri ch’hà da vene…. ». D’altri predicavanu in u desertu : « hà da finisce issa cuccagna », ma si ne ridianu cum’è di u van’ di Petrittu in piazza Santu Niculaiu. 

S’eranu ancu pisati utopisti anziani o sempre zitelli, gridendu urbi et orbi « indegnatevi ! ». Ma ancu elli l’avianu molle è a so capacità d’indegnassi s’arrestava à a qualità di a bistecca ch’elli avianu in u piattu. 

« Andate chi’, un ghjornu o l’altru, v’anu da calà i calafroni », ripetia a cantilena di Petrittu, incù e so canne chì macinavanu à l’usu Chaplin. Ma u si pigliavanu à a risa. 

È poi, una mane si sò discitati è u mondu era diversu. In l’aria tepida, era falata a nebbia.

Eramu in crisa.

Eccu,

Avà ci simu in crisa, dicianu tutti in pettu. O gridendula. 

A crisa chì i Petrittu ùn aspettavanu più. 

A crisa chì i famiti ùn aspettavanu micca, subbitania, pigliava à tutti di ribattu. 

A crisa cullettiva. 

Iè perchè chì a crisa era diventata cullettiva. 

Era quessa a nuvità. 

Sin’ora e crise eranu individuali. Si dicia, « un tale hè diventatu neru neru neru, hà avutu una crisa è ghjè cascatu seccu ». In Ficaghja al’ menu era cusì. Ùn si circava à capì. S’avia una crisa è basta. Si diventava neru neru è si tirava l‘anchetta. Da una crisa à quì l’altra, si rinnuvellavanu e generazioni è la nave andava cum’ella pudia. 

Ma a crisa in affaccu, ùn era listessa, l’avianu tutti à tempu. « Emu da cascà tutti tutti secchi, inseme. », dicia a vuciata santavugliata chì curria in i casali di a Strada di i Sanguinari in Ajacciu, in e villà di Miomu, di Sperone è in i Provence Logis. 

In ogni locu.

Infine, tutti, ùn si sapia. Un mancavanu i cuntrasti infiarati: « Quelli ch’anu da falà pè u fondu i primi, sò quelli chì pesanu », speravanu l’archimedi di i Caffè di a Gara. « I famiti seranu i primi à pate a fame ancu di più », suppunianu, cuntenti i clienti di Bar di U Corsu in Sperone 

Avà chì sò passati i seculi, avà chì issa famosa crisa di u segondu milleniu s’hè stradificata in a storia, ci rende ancu à bastanza fieri u modu in u quale s’hè sciolta. Per forza o per amore, anu ritruvatu u gustu di l’aranciu mecanicu, di i pomi bulliti, di e castagne cotte, di i fasgiuletti maghjincati in e ripate assudate da a materia casana riciclata, di a suppa di puncicule lazza, di u pullinaghju è e so galline à quattru creste, allevate troppu vicinu à e centrale atomiche sempre in attività. Turnate ancu e fine di settimana d’inguernu in paese, incù i pattogas chì sentenu, e bistecche vegan, è e serate à guardà l’Eurovisione in famiglia, u postu di telè imbrancatu nant’à a giriventula. 

Corsica, ten points….

Emu straziatu.

Ci avianu prumessu un mondu migliore. 

Ci simu. 

Ma cum’ella mi prudisce issa maglia di lana compra à Lana Corsa.