In stu novu campà, primu dischettu di Vogulera
2017-08-09 14:19:22

U primu dischettu di u gruppu Vogulera, creatu in u 2008, hè una tappa maiò in a vita di sta furmazione. Hà ondeci tituli, è hè statu arrigistratu ind'è MB Prod di Maurice Bastid, in Biguglia. Dapoi quasi dece anni, Vogulera hà campatu stonde meravigliose durante i so impegni, vicinu à gruppi maiò di a cultura corsa chì l'anu aiutatu è mustratu a bona andatura. 

A passione pè a so terra, a so cultura è a so lingua, a spressione puetica è musicale, u sensu di a macagna è u piacè di sparteli à più pudè sò e tematiche di stu dischettu. Da rimarcà, frà l'11 cumpusizione, a canzona "Ghjuramentu" in leia cù u ghjuramentu di l'eletti naziunalisti, durante a presa di putere di dicembre 2015 à l'Assemblea di Corsica, l’adattazione in lingua corsa di a famosa « Marche à l’ombre » di Renaud è un magnificu duettu cù u canterinu Sekli.

Prossima dedica : luni u 14 d'aostu ind'è Musica Vostra in Corti, 30 corsu Paoli, da 4 ore à 6 ore.