I Statinali di Villanova
2017-08-10 10:39:44

Creatu in u 2004 da a cumpagnia Locu Teatrale è sustenutu da a municipalità di Villanova, u festivale I Statinali hà pocu primura di e mode è di e tendenze, è vole solu mette in risaltu a creazione è a lingua corsa. Pè st'ondecesima edizione, i 17, 18 è 19 d'aostu, avemu una spusizione di u Cullettivu d'artisti aiaccini, attelli d'arti plastichi è di teatru bislingu (per i zitelli), una cunferenza nant'à Pasquale Paoli cù Antone Maria Graziani, demustrazione di liuteria, chjam'è rispondi è sette cuncerti (Trè face un paghju, Cirnese, Isulatine, Scola di cantu, L'Arcusgi, u coru d'omi di Sartè, Diana Saliceti).