E cronache di Petru Mari
2017-08-16 09:31:22

Fujiyama Vechjacoglizatu

Jurassic Parc

Mi vechjacoglizeghju.

A vecu vene.

Pianpianinu, mi sentu diventà reaziunariu à ogni modu di cambiamentu.

U minimu suspettu di mutazione chì porti in corpu a sumenta d’una qualunque pussibbile evuluzione, mi scumoda assai assai.

M’aghju sempre un pocu di cerbellu. A sò chì i vechjacoglizati, ci vulerà un ghjornu o l’altru à impedilli di vutà. O allora ùn ci hè chè da di’ à Macron di fanne una catecuria scantata, per eleghje i so rapresentanti, incaricati di fassi una minestra o di ghjucà à scrabble.

Qualcosa cusì.

Perch’elli ùn possanu rallentà a dinamica d’una evuluzione à a quale, d’altronde, ùn participeghjanu più.

So’ unu di i tanti vechjacoglizati.

I dinosauri, a natura ùn l’hà stirpati ?

S’elli s’eranu firmati, serebbimu tutti sottu à u cuntrollu di u tiranosaurus rex è u tempu si seria arrestatu à u cretaceu. Ùn ci seria nè Mac Do, nè Canal plus, nè u treninu d’Aiacciu, nè Jean Felix Acquaviva è a so Cumpagnia Maritima Regiunale, nè a fiera A Nostra Mela.

Nunda nunda.

I nostri antenati ùn si serianu varcati da l’alburi, seriamu restati quelle antiche scimie codilonghe appiccate à e pendi, senza nè cuscenza nè numeru di securità suciale.

Mi sentu diventà pianu pianu in associu incù a cungrecazione di Vechjacoglizatus Rex.

Simu assai in Corsica.

Più chè in altrò ?

Po’ dassi.

Ùn ci hè chè da vede i musi imbugnati à ogni annunziu di riforma, d’aghjurnamentu, d’adattazione à u tempu chì corre. Parenu spaventati da i grilli. Anu una opinione sola, s’ella si po’ chjamà opinione : per elli sò idee imbecille, tuttu ciò chi’ s’assumiglia più o menu à una pensata. Issa sentenza, vene da una frase detta è micca pensata da un Vechjacoglizatus Rex, chi’ avia betu troppu Acqua Acitosa, è chi’ cappio’ senza vulella chi’ una tassa contru à l’idee imbecill ùn seria mancu male.

Da tandu l’idee so’ turnate imbecille per definizione da i vechjacoglizatus Rex.

Vechjacoglizatu, mi sentu diventà.

A mogliu, in issu bagnu di fele chì si chjama l’opinione publica. Vogliu intende issa forma di misantrupia specifica à e vechje coglie, ma propiu vechje, chì odianu u generu umanu.

Mi n’avvecu à una cosa : sò scemu di i gatti è di i canucci. Aghju un gattu è un canucciu. Passu e meze ghjurnate in longhe cunversazioni incù u mio gattu è u mio canucciu. Inno’, solatimente incù u mio gattu. U cane hè muticu ma intende cio’ ch’omu li dice.

Ci vole chè vo vechete cum’elli capiscenu.

Mi sò Brigittebardorizatu.

Mi sentu penetrà pianu pianu in a cungrecazione di i Brigittebardosaurus Rex.

Ghjè a Corsica.

Serà a Corsica di dumane ?

Un Jurassic Parc, pupulatu di Vechjacoglizatus Rexè di Brigittebardosaurus, chì manghjeranu e furmagliette è aspetteranu u ritornu di e rondine.

Un Jurassic Parc duve l’avvene serà pruibbitu.

Mi trica l’ora di vedela, mi trica.

Micca voi?