E cronache di Petru Mari
2017-08-22 10:49:31

Bipulari

U mondu cambia o no’ ?

Forse si’, forse micca.

Prima, sè vo finiate fora di strada, erete tronacu, o pazzu, o trapanatu. Piccule cose semplici di una vite banale. Erete pazzu è nimu truvava à di’ fidighjenduvi incù u vostru ambutu in capu. 

Erete u trapanatu di a famiglia è basta.

Avà,  no’

Avà site « bipolaire ». 

Una malatia di pinzutu, pulita, netta, purtata pè i nostri lochi da u muschinu-tigru. A bipularità face a rinomina di quellu chi’ n’hè culpitu è chi’ si ne vanta. 

A classa. 

Site pazzu, ma ùn fate rimore è ùn calpighjate e purcaghje di nisunu. 

Ghjè una malatia di lussu, una furtuna pè i medichi chi’ e inventanu tutte per fà durà a manna. 

Fate sapè chè vo site bipulare è s’aprenu l’usci di a Cullettività Territuriale, di l’Uffiziu di i Trasporti, di l’ultime pagine di Corse-Matin o di u Paradisu.

Site qualchissia. 

U vostru fratellu ùn hè nè bipulare nè mattu. 

Corciu ch’ellu hè. Bipulare micca lu disgraziatu, hè solatimente cunnisciutu cum’è unu depressivu, incù u murale sott’à e carcagne. 

Ghjè futtutu. 

Li si chjodenu tutti l’usci, a so moglia si tene cù u maritu di Wonder Wuman è a so figliola parte in Katmandù à fumà l’erba tavacca. 

Vitaccia incun nunda da sperà.

A depressione ùn vale un chjodu in l’argus di faticati di u cervellu. 

Sè vo vulete un postu sceltu in l’assistenza pubblica, ùn vi sbagliate, dite di no’ à tutte e forme di salute mentale, aduprate a malatia di moda, a bipularità, prima ch’ella ùn cambie a moda. 

Moltu più chi’, avà bipulari più và è più ci n’hè. 

Anu capitu.

Anu a magiurità. 

Listessu pè i « surdoués ». 

In ogni famiglia ci hè un picculu mostru surdoué.

E casticatu. 

S’accopianu trà surdoués è bipulari. Ghjocanu in listessa categuria di i clienti di Castellucciu.

Tè, ghjustamente, 

Cumu si dice « surdoué » in Corsu ? 

Umbè…I Corsi ùn la sanu di’. Un ci hè chè da chere a risposta à un surdoué. 

I Taliani dicenu « superdotato ». Ete rimarcatu? U « superdotato ». Di a famiglia ùn site voi,  ghjè u vostru fratellu Talianu. Voi. Site bipulare Francese cursizatu è pudiate nasce. 

Vi valorizeghjanu, invece chi’ vostru fratellu u casticanu. 

Un sterete tandu à esse prumossu capu di u Serviziu di i Ciottuli è Tufoni di a merria di Bastia. A u vostru fratellu, a so depressione impeghjurisce. S’ellu hè furtunatu, ellu anderà piuttostu à tuppalli i tufoni. 

Abele è Cainu.

Quale, di u bipulare è superdutatu, tumberà à l’altru?

André Gide scrisse in « Les Nourritures Terrestres »:

 « Famiglie ! Vi oddiu ! Ziglie chjose; usci serrati; pussessu ghjelosu di a felicità ».

 Finalmente mi dumandu si’ u mondu hà mutatu, muta è muterà mai, da quand’elli anu principiatu i strazii à quand’elli s’anu da compie.