E cronache di Petru Mari
2017-08-29 10:33:17

Donne estetiche o sintetiche

 Un ci vole à cunfonde l’istitutrici è l’estetitrici. 

L’istitutrici so’ pilose. L’estetitrici i li caccianu (i peli). 

Ma ista volta cambia. So’ l’estetitrici chi’ anu i peli inziriti. 

Da a zerga. 

So’ entrate in prutesta / perchè chi’ e legi li pruibbiscenu oramai di spilà e so clienti / aduprendu e tecniche muderne cum’è a luce pulsata. 

Pulsata, micca pulzata. 

Si l’estetitrici principianu à pulzà l’istitutrici, altru chè spilate anu da esse. 

L’anu ancu da rascà a mezina, l’anu da rascà si’. 

Dunque, / a luce pulsata, mandata nantu à e pelle (è micca e palle), /solu i medichi a puderanu aduprà/ per spilà e pilose, pilà e pilate è spellà e cughjose. 

L’estetitrici si duveranu ghjuvà di e pinzette. 

Allora ùn so’ cuntente. 

E pinzette. 

Pensate, e pinzette pinzute per spilà à una à una tutte e setule di e l’istitutrici /ch’ùn so’ tutte pinzute.

Pigliate u casu di Madama Mignoculi, l’istitutrice. 

Quantu ci hà da mette l’estetitrice à caccialli i so peli / à a Prufessora di e Scole ? Và à rascalla una volta à l’annu. L’hà zeppi i peli /quant’è a furesta d’Aitone. Pelu à pelu ci metterebbi sette anni, à cundizioni di travaglià ancu di notte. E quantu li custeria à Madama Mignoculi per avè a pelle liscia ? 

A dilla franca, /valeranu issi strazii per avè a pelle iscia, liscia ? Li cunvenerà propiu d’avè a pelle iscia iscia,/ liscia liscia,/ quandu  u so pilame a para da l’inguernata purcina,

Vicina ? 

Issa lofia.

Ella ch’hà sempre rimpruveratu à Jurgenz, u maritu, d’ùn avelli mai compru un mantellu in peli di cunigliulu. 

Basta à lasciattilu cresce / u pelu /è po l’ai u to mantellu di cunigliulu, dice Jurgenz chi’ suda u galabbu è a ragio’. 

Culor grisgiu u mantellu. Naturale. Bio’.

I dermatolochi chi’ vedenu u pelu in l’ovaghja / a s’anu capita chi’ quella di spilà e pilose era una oppurtunità, da poi chi’ u pelu hè statu dichjaratu da elli stessu / nimicu di a donna è amicu di i pidochji. 

In Sardegna anu trovu a risposta. 

L’isula surella,/ a sapete,/ hà cinquant’anni è un bellu ciuffu di peli d’avanzu nant’à a Corsica. Quallà e donne ùn stanu à pressu à i peli. Si facenu cambià a pelle, hè più infuria fatta. Si mettenu una pelle sintetica. Sè v’andate da Bocche di Bunifaziu in ghjo’, viderete nant’à i lati di i stradoni Sardi,/ pannelli di pubblicità tamanti, duv’ellu ci hè scrittu : « incù a pelle in caucciù, peli mai più ». 

Viderete, hà da fini’ a cuccagna. 

Da donne estetiche muteranu à donne sintetiche.