Cronache di Petru Mari
2017-11-07 11:06:23

Cumu si dice « hypocondriaque » in Corsu ?

I Taliani dicenu « ipocondriaco ». In Corsu, s’usa a parulla « picondria ». S’eo mi riferiscu à Ghjuvanni Chiorboli, u papa di i radicali, a parulla veneria da u Grecu « ypocondrion ». « Ypo », sottu è « chondros », u cartilagine di e coste. Ghjè a parte laterale di a panza duv’ellu ci hè u fegatu è a merza. Un settore chi’ fabricheghja « l’umori », cum’elli dicianu l’antichi: u malumore, l’umore bonu, l’azizume è a paura d’esse fritti s’elli si inceppanu l’ingranasgi di i nostri interiori. A picondria, hè citata da parechji pueta cum’è per u fattu Vattelapesca : « è tù, cara Tuttuccia, guariscerai d’a to picondria ». Ma, caru Vattelapesca, issa paura, a picondria, ùn si guarisce, megliu, ghjè a cumpagna a più cara di quellu chi’ l’hà. A picondria hè una amica chi’ sumena un burdellu terribbile in corpu à quellu chi’ ne hè pregnu. Quessu o quessa, hà u cervellu piuttostu in un disordine chi’ muta à malincunia è in un terribbile timore di moresi carcu di tutte e malatie.

Perchè chi’ vi facciu issi discorsi ? Ind’è per fà u mio sapiente, per muntammi a seca chi’ s’eo ùn la facciu à di per mè, quale m’alliscerà ?

A dilla franca, eri emu celebratu i 150 anni di Rosa. Rosa..! Rosa di Ficaghja alo’, a mo surella. In fatti hà 35 anni micca di più, ma cum’ella hà a picondria, tutte l’aventure mentali li so’ lecite…Pensate, Rosa a s’hà francata di sette cancari, quindeci rotture d’anevrisimu, ottantasei infarcti orezzinchi, eppatitte in quantità, è micca solu A o B, chi’ ci hè passatu u saltere sanu. E ùn parlemu di e grippe ! Vint’ottu grippe di tutte e mame : Giappunesi, Senegalesi, Spagnole, Tailandesi è Taravesi, per cità e più esotiche. In oltre, hè stata culpita da u primu virus ebola di Corsica, hà trè pene in a spalla dapoi l’età d’un annu, una colite, e dite incruccate, ùn po’ scucinà è tredeci ulceri chi’ finalmente riescenu à rendela certe volti felice.

Hè stata furtunata di ghjunghje à u so anniversariu, dice.

Pochi affari, pochi…

C’est una miraculata.

Rosa, campa cum’è s’ella era carca di tavule, trascinendusi nantu à u spinu a soma terribbile di e so falze malatie. Hà a picondria.

E ghjè cuntenta cusì.

Un hà bisognu di noi nè di parulle astute

Rosa pianghje quand’ell’ hè in salute.