E cronache di Petru Mari
2017-11-08 11:34:08

Antonia è a mosca

Antonia, chi’ callu...

Ma chi’ callu, O ‘ntonia.

Antonia ùn sente, dorme, imbriaca di prosecco ch’ella s’hè sciaccata in issu anniversariu, chi’ cascava oghje. Dorme, pienghjendu per ùn so’ cosa. U tempu chi’ passa, forse ? Ghjè briaca. Briaca briaca.

Andate à capisce voi e morte secche intanate in u fondu intimu di a so grotta.

Provu à parlalli:— Antonia, ùn pianghje o cara, si’ goffa quand’è tù pianghji.— Ma ùn piangu micca, mi risponde in un mezu comà impastatu.— Ah…So’ compii pranzone, festa, amici, cantu è ballate pazze. Li ferma solu l’addisperu pè u tempu chi’ passa senza pietà. Ancu à mè.

Solitutine, solitutine alcoolizata. E so idee, traforcanu in a so testa in spassighjate mentali fosche tantu ch’ùn ci si vede. Spassighjate mentali amuzzate chi’ schizzanu in u so cervellu, si cumbattenu, si imbuleghjanu poi si morenu. Chi’ burdellu.

A mosca. Mi’ una mosca. Ella s’hà da campà cun issu pranzu ch’ella vene di scopre: un pranzone umanu, longu tiratu nant’à u divanu. A mosca u sente, li fiata l’omacu squisitu. Colla à sbuffulate da a bocca aperta d’Antonia.Furgani, canti è ballate: ghjè festa d’anniversariu ancu pè a mosca. Per mè no’. Per Antonia ùn la so’.

A mosca principia u viaghju iniziaticu di a so prima è ultima cena. Svulitteghja intornu à a durmigliona runfiante è odorante. Eccu i nagri, pensa l’insettu. Entre in u nagru mancu. Ma subbitu, a manata fiacca di u cenone mezu inzuccatu face per inciaccalla in una sternutata chi’ a manda per aria.

Andà pianu, si dice a mosca, per ùn lasciacci a pelle in u mio ultimu pranzu. U scopu di u so viaghju iniziaticu hè solu quessu : campà. Campà à fondu a so vita curtissima.

Eo so’ vicinu à u carminu infiaratu, sudu. Guardu à Antonia. Li murmureghju:

— Antonia, aghju u callu...

Ma quella, acqua in bocca. Infine, acqua forse no’.

U nasu li sanguineghja. Li sanguineghja u nasu à Antonia. Serà a manata di prima ? A mosca hà vistu a perla di sangue. Hè festa, hè festa ! dice in a so lingua di mosca, ch’eo capiscu, in issu ghjornu di fine d’anniversariu. Ma per Antonia hè digià u ghjornu dopu. Ghjè quessa a causa di a so depressione?

A mosca si ciuffa in mezu à a candella di sangue, allupiata di felicità festiva è imbutrata di sanguiniccia. Beie, beie, beie da spanzassi. Tutta a so vita stà qui’ nant’à issu nasu.

— Antonia, ùn pianghje o cara, si goffa quand’è tù pianghji!

— Ma ùn piangu micca— Ah...

Un pianghje micca, hè goffa di natura è nutrisce una mosca scimatulita da issa festa di lindumane d’anniversariu. Ghjè goffa al’ di fora, simu intesi. Ma al’ di nentru? Al’ di nentru, per avà hà a so testa viutata; Si gode a so scimia d’anniversariu.

Seranu compii I viaghji iniziatichi? Un la so’. Quellu di a mosca si’, chi’ u patrone di a so corta vita è di a so morte, so’ eu. U so cenone di dopu anniversariu hè duratu à bastanza. A so vita dinù. Pigliu a decisione, postu ch’eo aghju dirittu di vita è di morte: un pattone nant’à u nasu. Eccula inciaccata, senza vita. Fermu di colpu u viaghjiu iniziaticu di a mosca. Ghjera u so ultimu pranzone. Averà capitu? Averà percepitu u sensu di a vita frattempu ? Umbè...Antonia balbutteghja. Parla durmendu. U so nasu à patata sanguineghja. Ella? Ella u so viaghju iniziaticu? Compierà u so primu, alcoolizatu di sogni di viaghji amuzzati, impussibbili, in issu lindumane di festa. Impussibbili i sogni, forse si’. Ma sogni quantunque. Quella d’Antonia, di a mosca, a mea, serà, a vita vera ?— Antonia, chi’ callu...

—-Un pianghje o cara chi’ si’ goffa quand’è tù pianghji.— Ma ùn piangu micca.