Cronache di Petru Mari
2017-11-15 12:00:12

Louis 11

Louis 11

 

Serà mortu Louis 11 ?

Ghjè a dumanda ch’eo mi forzu à fammi quand’eo fideghju u mo maritu chi’ brama di liccà à Malikà.

Li pongu issa quistione per falli pensà à cose altre

A altre cosi

Chè pruminà,

Cù Yasminà

 

« Freres humains qui après nous vivez

N’ayez les cœurs contre nous endurcis »

Hè mortu François Villon. 

Villon, micca Fillon.

Fillon nancu.

Hà campatu in tempi di Louis 11, Villon.

Era un ernese. Hè finitu appiccatu è e forche ghjustu dopu à avè scrittu la Ballade Des Pendus.

Louis 11 l’hà fattu fà i mangani azzingatu à una funa

Dicenduli :

« Vai chì cusì ai da sperimentà ciò chè tu scrivi… »

Face chì

Si’ François Villon hè mortu, Francois Fillon s’hè vivu.

Ma Louis 11 ?

 

Serà mortu Louis 11 ?

Ghjè a dumanda ch’eo mi forzu à fammi quandu a situazione hè critica.

Mi pongu issa quistione per pensà à cose altre.

Per pensà à altre cosi

Chè à una critica,

A Margherita

 

La fillette.

Quandu Louis 11 dicia à unu « ti chjucchemu a fillette », a persona si dicia « hmm, què l’aghju da senta passà. » Ma la fillette ùn era mancu à pena issa gabbia di ferru appiccata, duv’ellu chjudia à une pochi ch’avianu bisognu d’amparà u so calateo.

Quellu di Louis 11.

Innò.

La fillette, era una catena incù u so pisone, trascinata da quelli chì pensavanu altrimente chè cio’ ch’ellu pensava Louis 11.

Per u fattu u mio maritu, issu techju di pasta asciutta testardu è sfacciatu, struzzica u vespaghju di Louis 11.

Per esempiu, u cardinale  Balue. Andava à dì a messa incatinatu incù un pisone à pressu.

Quand’ellu traversava à Notre Dame di Parigi, cantendu tantum ergo sacramentu, facia u so pisone: pliling pliling plon ! Pliling pliling plon !

Ghjera cusì Louis 11.

Un omu veru à l’antica incù l’anche pilose.

Ma ùn vi saperebbi dì

S’ellu s’hè vivu.

 

Serà mortu Louis 11 ?

Ghjè a dumanda ch’eo mi forzu à fammi quand’ella l’avvinghje a brama à issa rubbaccia di  Louis, u mio maritu.

Quellu disgraziatu ch’hà da fini’ incù una catena appiccata à un pede.

U so pisone hà da fà pliling pliling plon ! Pliling pliling plon andendu à vutà.

Allora chi’, beatu è sepiatu, puderia piglià u trenu ondeci !

 

Mi pongu issa quistione per falli pensà à cose alte,

Per pensà à altre cosi,

A issu malavviatu

Chè à u demoniu

Di u vinu

Di Patrimoniu