Corse ! De la résistance à la résilience
2017-11-16 14:52:30

Stu novu libru d'Edmond Simeoni, stamperia Sammarcelli, porghje una cuntribuzione à a memoria cuntempuranea è permette un cambiamentu puliticu necessariu è primurosu. Si fonda nant'à fatti cunnisciuti di a vita pulitica corsa dapoi 60 anni, i prutagunisti di u dramu corsu sò:
* u Statu è i partiti - JP de Rocca-Serra è F. Giacobbi- chì sò sempre stati ligati  
*i naziunalisti. 

Toccu u primu capitulu, si tratta di l'affare u più primurosu, cù " Corse : le désastre. Où étaient-ils?". Tutti i prublemi sò allistinati rispettendu a cronolugia dapoi l'Argentella in u 1960, sin'à a nostra epuca. Fubbe una stonda puliticamente turbata, di ripressione, cù e ghjustizie d'eccezzione, a multiplicazione di statuti imposti (à mumenti 4), e pulizze micca ufficiale di Francia da u 1977 à u 1980, u clientelismu scatenatu, l'alienazione di e terre, a negazione di a cultura è a gestione economica pocu seria. Si pò fanne oghje u bilanciu è cunnosce e rispunsabilità di tutti l'attori. Ma ci hè stata dinù l'epuca pusitiva cù e misure di F. Mitterrand, presidente di a Republica in u 1981, Rocard è Joxe pè a ricunniscenza di a particularità istituziunale di a Corsica, u sciuglimentu di a corte di sicurezza di u Statu, a liberalizazione di l'infurmazione, l'annistia, u sustegnu à l'apertura di l'Università di Corsica.

Nimu cuntesta u rolu visiunariu di François Giacobbi, cù a creazione di u Parcu Naturale Regiunale di a Corsica; l'azzione di u senatore Nicolas Alfonsi ind'a dimarchja di u Cunservatoriu di u Litturale; l'avanzate di a mandatura di Paul Giacobbi pè l'iscrizzione di a Corsica ind'a Custituzione, a cuufficialità, u statutu di residente. Senza scurdassi di u rolu di tutti l'eletti prugressisti, in particulare cursisti, e forze vive, l'associ, i sindicati, i riprisentanti di a diaspora, e forze di a giuventù, è altri corsi d'ogni tendenza pè difende l'interessi di u Populu corsu. Eppuru, pè u più, u Statu è u sistemu clanistu eranu contru o ùn si primuravanu di e lotte pupulare. L'eletti cuncurrenti di i naziunalisti à l'elezzione territuriale di dicembre 2017 ùn sò micca rispunsevuli di e malfatte storiche di u clanismu, ma anu da agì sott'à a tutella strinta di Parigi chì hè contru ogni evuluzione pulitica significativa in l'isula. In quant'à l'elettori Corsi, deveranu ghjudicà è sceglie !