Cuntrastu cù un mazzeru, di Ghjuvan Micheli Weber
2017-11-21 10:12:26

Anzianu prufessore di e scole dapoi più di trent'anni, rispunsevule oghje ghjornu di prugetti à u Canopé di Corsica, Ghjuvan Micheli Weber hè musicante, canterinu, autore-cumpunidore, membru di l'associ di musica tradiziunale « I Voci di a Gravona » è « Dopu Cena ». Cun elli hà arrigistratu sette dischetti. Ghjè ancu un scrittore attalentatu. U so novu libru « Cuntrastu cù un mazzeru », scrittu in corsu è francese, hè publicatu à l'Edizione Colonna. Rammenta l’intervista ch'ellu hà fattu durante parechje stonde, à principiu di u 2011, di un mazzeru, persunagiu stranu, maleficu pè certi, « passa anima » pè altri.

Hè cacciadore durante so sonnii, è u cignale ch'ellu tomba cù una mazza serà in fatti una persona ch'ellu cunnosce è chì hà da more prussimamente. "Si nasce mazzeru, ùn lu si diventa micca. Pocu impreme l'età, a situazione suciale, ghjè una chjama. Si pò sceglie di rispondeci o nò" hà dettu l'autore. Ghjè una leia trà a Corsica anziana è quella d'oghje, trà l'anziane credenze è a giuventù, trà u vivu è u mortu. Campa cusì à l'appiattu senza palisassi ma "…chì campa à bughju cerca sempre a luce…".