Cronache di Petru Mari
2017-11-22 11:45:37

Un basgiu di Falcina

Un certu ghjornu di marzu, Falcina m’hà sciaccatu un basgiu. O piuttostu hà pruvatu.  Ma, senza mancalli di rispettu, a m’aghju ghjucata à a risa.  So’ incapace di divvi perchè ridia, da duve venia a mio irunia, à una stonda di francà u passu.  Ci pensu sempre oghje, ma hè un misteru ch’ùn aghju sappiutu spacificà. Eramu di marzu a mane, à l’iniziu di u dolce veranu di A Valletta, a capitale di Malta. M’aspettavanu une pochi d’amici in cumpagnia di i quale ci prumettiamu di travaglià. Ma u portu di Malta ci allusingava è po l’amicizia mediterranea ci purtava piuttostu à un dolce farniente. Purtatu da issa molle decisione chi’ prumettia stonde spenserate, mi so’ arizzatu tranquillu per appruntammi à andà, quandu in più bella u mio pettu, e mio bracce, u mo spinu u mio corpu sanu, so’ diventati focu. Fiamme chi’ mi si manghjavanu tale un incendiu ind’una machja secca.  Un incendiu chi’ pianu pianu si spinghjia à tempu à mè. Aghju capitu subbitu.  U core. Furtuna, l’imbulenza ùn hè stata tantu à ghjunghje è à purtammi à sirena stridente à l’ospidale Mater Dei. Avia a cuscenza serena chi’, chjinatu in a vittura di l’urgenze, facia u mio ultimu viaghju. Fidighjava à traversu à u vetru i decori di issu carrughju di A Valletta, forse per coglie l’ultime imagini di a mio vita. In l’imbulenza si davanu dà fà in gesti secchi è precisi. E zitti. I medichi chi’ m’aspettavanu m’anu trascinatu di corsa in u carrettu è, spatanscendu, anu principiatu à compie i gesti nervosi ch’elli avianu amparatu, cum’è s’ellu si trattassi d’andà più di furia chè a morte. E ficca è dalli a sonda di u cardiolocu zirbata sin’à e mio vene tappate. Sudava u cardiolocu, ch’avia quantunque una certa età è a panza pendiconi, segnu di l’abusu di a pasta ‘ncasciata, cum’ella piace à i Siciliani è à i Maltesi. L’altru medicu, magru è snellu, fidighjava u cardiolocu d’un aria suspettosa. I so ochji l’interrugavanu, aspettendu una risposta à una dumanda indotta.  U cardiolocu, crosciu intintu, l’hà guardatu è l’hà fattu di no’ incù a testa. Tremindui anu cessatu di scumbatte, si so’ addirizzati è anu fattu rullà u carettu incù nantu cio’ chi’ restava di mè: a mio cuscenza sempre sana ch’aregistrava tuttu è u mio corpu chi’ tirava l’ultime toppate Un eranu più pressati. Chjinatu in u mio lettu in u serviziu di cardiulugia, avia l’ochji chjosi. Era sfinitu, senza forza. Ma u capu era salvu. Sentia i medichi chi’ mi giravanu intornu murmurendu. Per elli, ùn pudia sente.  E purtantu si’, sentia. Si parlavanu imbulighjendu Sicilianu è Inglese.  Aghju chjaramente percepitu u discorsu ch’ùn duvia sente.  Parlavanu di mè cum’à un futuru mortu.  Per elli, a mo cascia è i so chjodi di ramu eranu quasi pronti.

Ghjè tandu chi’ m’hè venuta a voglia di ride. Di cosa ?  Umbè… Soca Falcina ch’eo sentia vicina mi vulia sciaccà un basgiu incù a so bocca senza labbre è piena di denti. Falcina. Affascinente, tutta civetta.  Dentru di mè ridia.  Falcina era un scheletru sexy. Ma un scheletru d’oghje è ghjera bramosa di fà di mè un scheletru di dumane. Ghjera a ragio’ di a so lusinga. Averaghju da accettà u so basgiu o no’ ? Per mè era di no’, ma aghju tricatu per decide, chi’ pena ùn li ne vulia fà.  Ci era una altra cosa chi’ attizzava u cio’ chi’ firmava di u mo focu : era l’eccitazione à l’idea di francà u passu. Averia vulsutu cunnosce a cunfine di u dopu. Entre in a cumunità ch’hà passatu l’Oriente è chi’ oramai sà, s’ellu esiste o no' a permanenza di u spiritu. E quessa dinù mi facia ride.  Andate à circà… Si’ cio chi’ ferma di noi si ferma in l’etere, megliu cusi’ chi’ ripiglieraghju u mio viaghju. In Malta. Si’ invece si casca in u niente, meza bastunata. U niente hè qualcosa postu ch’omu ci s’annega. Mi n’arrangeraghju. In tantu Falcina mi face u musu. Cumediante più chè tragediante: perchè chi’ mi venerà issa voglia di ride di issa cumedia ?