Cronache di Petru Mari
2017-11-29 11:28:57

Una cronaca per tè

O quand’ellu venerà

U tempu di e susine

Averai asgiu à cantà

Cum’è le cardelline

Salterai in un lampu di frenesia

Da speranza à nostalgia


O quand’ellu venerà

U tempu di i virzoni

Di lu scuru accasà

Quelle notti à pasponi

Ne salterai in fantasmacuria

Da verità à vucia


O quand’ellu venerà

U tempu di e bisgiule

Ch’ellu ùn si dicerà

Mai chè parulle grisgiule

Salterai in un ultimu sennu chjaru

Da u dolce à l’amaru

O quand’ellu venerà

U tempu d’esse tristi

Un valerà à chjamà

I diavuli è i cristi

Ma a sucetà chì ci fece sepiati

L’accademia di i strampalati

Allora, t’hè trimata a curatella o no’ ?

 

Tantu chi’ po’ fà…

Un ghjornu ci emu da imbarcà

Eo è tù

Nantu una barca incù e vele

Eo accertatu è tù sempre à l’inforse

Anderemu culandi

A vede i negozii di l’altri

 

Iè chi’ un ghjornu ci emu da imbarcà

Eo è tù

Nantu una barca incù e tele

Per apprudà

Duv’elle ridenu e donne fasciate

E l’omi troppu sgualtri

 

Iè ch’un ghjornu ci emu da imbarcà

Eo è tù

Nant’una barca incù a sperenza

Di vede

Si’ Zanzibar hè un mondu in veru

O loche sunniate

 

Iè chi’ un ghjornu ci emu da imbarcà

Eo è tù

Nant’una barca incù a cuscenza

Di duvessi custrui’

Cù soste è traculinate

 

E poi, l’anima concia

Vulteremu

Tù per cumpone a to sinfunia

Eo, cù l’anghjuli di a Monacia