Cronache di Petru Mari
2017-12-06 10:55:47

U Libbru

 

« Allo.. Patre Eternu ?

Allo !

Ghjè Eva.

Aghju à pena finitu u to libbru. Ci hè tante cosi ch’eo ùn capiscu, sai.

Allo Patre Eternu, mi senti ?

Ti chjamu da u mondu Bleu Marine duv’è tù ci hai mandatu.

Hai una stonda ?

Ti posssu fà qualchi’ dumanda?

Prima ti vulia ringrazià pè u carattere educativu di e to legi, tutte scritte in l’Anticu Testamentu, ch’eo vengu di leghje, postu chè tù ci hai zirbati fora da u Giardinu d’Eden. E ci vole chè n’amparghimu tuttu.

Avà a capiscu perchè chì u nostru Papa, u vostra rapresentante, ùn pò pate l’omossessuali. L’avete scritta in u libbru : l’omossessualità hè un abbuminiu. L’aghju detta à Cainu è à Abele. Da poi aghju paura ch’ella finisca male trà di elli, vistu chì Abele hà pigliatu l’abbitutine di mette i mo soutien gorge. A Ti possu fà una dumanda, hè vera? Vulerebbi vende a mio figliola cum’è schiava, cum’è tù a previdi in u libbru di l’Esodiu. Chì ne dici, quantu possu dumandà ?

Allò ! Patre Eternu ? Perchè ch’ùn rispondi ? Nant’à l’altare sacrificale, cum’è tù a cunsigli in u Leviticu, aghju fattu arruste un manzu. Sò, da e To Scritture, chì u prufumu d’arrostu ti piace. Ma à i mio vicini, nò. Si lagnanu di u rimore è di a puzza.

È bestemianu.

I possu piglià à lignate ?

Allò  Patre Eternu ?

U Leviticu, in u versu 25, accerta ch’eo possu avè schiavi, patti è cundizioni ch’elli sianu compri in paesi strangeri. Adamu m’hà dettu ch’eo mi possu cumprà un Marucchinu o un Senegalese. Ma un Alemanu nò. Spiecami. Perchè ch’eo ùn mi possu cumprà un schiavu Alemanu ?

Allò ? Ci si’ ?

U mio vicinu ellu, insiste per travaglià u sabbatu. Ghjè impiicatu à Casinò. In u libbru di l’Esodiu, versu 35, dici chjaramente ch’ellu ci vole à tumballu. Sò obbligata di tumballu eo persunalmente eo, da per mè, eo stessu ?

Patre Eternu ? Ci si’ ? Perchè chì T’ingorghi ?

Tuttu ùn Ti dumanderaghju oghje chì hai altri capatoghji istu pocu incù l’elezzioni Territuriali in Corsica, u scumpientu di Trump è a cuscia d’ozone.

Avà chì l’idee di u mondu Bleu Marine si sò banalizate, pudemu cappià a piena: a rubbaccia di u mio ziu hà duie ripate d’ortu in Ficaghja. Ghjè andatu contr’à u Leviticu, versu 19, postu ch’ellu hà piantatu dui legumi diversi nant’à listessa ripa. A so mugliaccia, Affidà, dinù ella ùn hà rispettatu a Lege. Hà messu dui vestiti incù duie stofe differenti, un jean di cutone è un tee shirt in acrilicu. Sò propiu obbligatu d‘addunisce tutti l’abbitanti di u paese è tumballi à petrate? Ùn seria micca più simplice ch’eo zinghi focu à i so letti, cum’è tù a scrivi in u Leviticu, versu 20, à prupositu di quelli chì dormenu trà di cunsanguigni ? Allo !.. Patre Eternu ?..

Perchè ch’ùn mi rispondi ?

Aghju capitu.

Chodu u Libbru è leghju à Mickey.

Feraghju a cunniscesa di e legi sacre di Donald Duck.

L’hai lettu tù ?