Cronache di Petru Mari
2018-01-12 11:04:31

I Pacchetti

Futtu finisce, pacchetti ùn si ne riceve più.

Duve so’ passati, duve so’ passati ?

Simu futtuti, a nostra cultura hè futtuta, i preti so’ futtuti, e mele rinette so’ futtute.

Facia parte di a nostra cultura, u pacchettu di La Redoute o di Manufrance, pieni di lenzole, tuvaglie, calzunetti interlock, calze è sciarpe di lana, fucili, tornavita, cazzarole è lambichi. U pacchettu s’assumigliava à noi, u pacchettu. U pacchettu ghjera a nostra espressione, u pacchettu.

Un vi vogliu fà un discorsu nostalgicu è inutile nant’à i pacchetti d’una volta. Mancu vogliu trattà di a cundanna di quellu pacchettu chi’ face sughjornu in i lochi di vacanze.

Serianu parulle di prete.

L’impurtante hè piuttostu di visticà in a psiculugia di u pacchettu.

Perchi’, malgratu a perdita di i pacchetti di prima, u populu Corsu si ne và quantunque in pacchetti d’avà.

U populu Corsu hè un pacchettu.

Un pacchettu, rinchjosu in sè stessu, hè sordu, mutu, cecu è campa in u bughju. Hè caverniculu u pacchettu. Quessa hè una. Dopu ci hè a dificultà chè n’avemu di parlà è per disgrazia, ghjè u pacchettu chi’ deve parlà per noi.

Infine, pocu fà era cusi’.

U pacchettu, ghjera u linguaghju adupratu, quandu e cose ùn si sapianu o ùn si pudianu dì.

Cacciatuci un scoppu rabbiosu u tempu d’una accendita, a so espressione era tantu povera ch’ùn ci si intendia nunda. U pacchettu parlvava purtantu per noi, a ripetu. Dopu, stunemuci d’ùn esse capiti…Champollion hà sappiutu scioglie l’ieruglife. Ùn sò siguru ch’ellu serebbi capace oghje di leghje u linguaghju di i pacchetti muti.

Issu pacchettu, à l’origine, in tempu di fattori, pè u più era un regalu, o una gattiva surpresa per quellu chì u ricevia. Per finilla hà vistu u so significatu metaforicu mutà, tempu passendu. Una decina d’anni fà, un pacchettu era una bella femina. Mettimu, una tale o una altra tale ( i nomi ùn li dicu) ghjè un pacchittone, o un pacchittellu chì si pudia ancu spacchittà s’ella ci accunsentia.

Issa metafura hè morta, tomba da e mutazioni di u pacchettu.

In l’anni sessanta, i giovani mettianu i pantaloni stretti stretti per ch’ellu si veca bè…u pacchettu, cum’ella si dicia tandu. Era a sola pantumina nuziale chì, noi, poveri mammiferi ingrunchjati, eramu capaci di fà. Una volta. Ancu di grazia, ci simu liberati di issa espressione vergugnosa di a virilità esposta.

E vere felicità sò sempre piatte.

Una rimarca, per compiela : i pacchetti ci vampirizeghjanu, ùn supportanu a luce di u ghjornu.

È sè n’esciamu da a bughju ?