Cronache di Petru Mari
2018-01-16 11:09:03

Si spinghje u razzinu di i murpioni.

U murpione, ghjè à tempu un animale, chjucu chjucu è una cultura in dirotta in sè stessu.

Chì seca n’hè, tuttu si more, tuttu finisce.

Era propiu megliu prima, in tempu di pidochji.

U murpione, issa creatura di u Signore, campa à mezu à i peli umani. Iè, l’hà creata u Signore, à a so imagine. Sì pò dunque suppone chì… Ma lasciemu reghje, l’affare s’imbrutterebbi.

Chì bisognu, sempre di ragiunà, chi’ bisognu si’ …

Vultemu à u discorsu.

Ghjè a presenza di issu animalottu in forma di cranciu ch’hà fattu nasce a gattiva abbitutine, ind’è l’omi, di grattassi e palle. A capite avà ciò ch’eo vogliu intende ?

In Corsu, issu crancettu minutu minutu, hè smaritu ancu da u vocabulariu.

Tuttu si more, tuttu si more.

Aghju avutu à circà u so nome nant’à i libri : u « picciulatu » si chjamerebbi.

Perchè u picciulatu ? Perch’ellu campa appiccatu à i piccioli di pelu. I peli so’ u so ecosistema naturale.

L’ete forse intesa o letta in i media. Ghjè l’agenzia di stampa Inglese Blooomberg ch’hà cacciatu issa nutizia, impurtante, chi’ lascia intende un cambiamentu di civiltà. Chi’ vulete, i giurnalisti chì travaglianu ind’è Bloomberg, elli nenzu andà à visticà e cimici, i pidochji è i picciulati, chè di corre in battle dress à pressu à Daech in Siria.

Tamantu sbagliu !

I sullati è e sullate si rasanu i peli.

Ghjè una tragedia pè i murpioni chi’ sò scemi di i peli di i sullati. Face chi’ u murpione, ambiente di vita ùn n’hà più, mancu in Corsica.

Morti i peli, mortu u razzinu di i pidochji nustrali.

A parulla hè nata seculi fà, in i regimenti di fantacini, sullati pilosi cum’è e scimie, chì viaghjavanu senza mai lavassi. U fantacinu cughjosu era una America per issu cranciu microscopicu. Hè nata a parulla tandu, chì u picciulatu « mursicava u pidone », dunque « murpione ».

U ministru Nicolas Hulot chi’ face ? Cosa aspetta per pruibbi’ à a ghjente di rasassi a natura è salvà isse vite cundannate da u desertu pilatu.

Seria ancu un serviziu pubbicu…Inno’, publicu

Ùn sapete l’impurtenza di i peli pubbichi è u so valore in u vocabbulariu ? Ancu ecunomicu. Chì travaglione di riacquistu, ch’ellu deve fà u fantomaticu Cunsigliu di a Lingua, quellu di u circondu è l’Uffiziu Agriculu incù i so pastori barbuti.

A faccenda serà cumplicata: segondu i giurnalisti di Bloomberg, chi’ anu capatoghji più impurtanti chi’ di sparghje infurmazioni nant’à i carnugli in Iraccu, 99% di l’Inglesi è 75% di e Francesi si rasanu a natura.

È 80% di l’Americani, maschi è femine in vuleghju.

Chì vita cagna.

Era megliu prima.

Tuttu si more. Ancu i picciulati.