Cronache di Petru Mari
2018-01-19 11:42:17

U veranu mi face trigà.

Chi’ sera? Mai ùn aghju aspettatu u veranu quant’è quist’annu è mai ùn m’hà fattu tricà cusi’.

L’aghju chjamatu purtantu, suminendu garofani, bocche di lione, vitalba fiurita, piantandu rusulaghji di tanti culori, capi di vigna d’ogni qualità, piante chi’ s’arampichjeghjanu, d’altre chi’ si sparghjenu.

E aghju curatu u veranu per ch’ellu carezze u mio circondu di natura di u calore tennaru di a vita.

Chi’ serà ? M’avvecu ch’eo so’ statu troppu pressatu per suminà, piantà, trapiantà, hè quessu l’affare. Nè a meterolugia nè eo eramu pronti. Furtuna chi’ u ventulellu cutratu ùn abbia per avà dannighjatu per nunda e mio sperenze. Tuttu hè fermu, in aspettera.

Ma u mio giardinettu trica à esse fiuritu è imbalsamatu.

Hè sigura, so’ statu troppu pressatu, per dà tempu à u fremitu tepidu è umidu di a mio terra nova, per ch’ellu cove in u veranu bracanatu e più belle sumenti di a mio stagione nova.

Quella di u mio rinascimentu.

Forse hè chi’ u veranu ancu ellu hè angusciatu è vole ritene u mio tempu.

Ma hà da fini’ per cappià i freni. Saperaghju tandu si’ u mio veranu bramatu si spanna in rosula rosse, o si’ dillaziatu, m’orna di fiori di plasticu.