Cronache di Petru Mari
2018-01-23 17:15:55

L'ultimu Mohicanu

Finta scienza

Un racontu chi’ face paura

 

Eccuci` ci simu

So’ eo l’ultimu Mohicanu

Sò eo

Hè cascata à mè

Un averanu trovu chè à mè ?

Bè sì

Chi' seca

Pudia esse qualunque di noi pudia

Ma hè cascata à mè chi’ mi fermu solu

 

Chi’ silenziu

Sentite…

Hè nurmale,

So’ l’ultimu Mohicanu

Mi fermu u solu

U solu à parla Corsu

U solu à ricurdammi du i mulatteri è di u tempu di e surgenti

U solu à esse ciò chè no fuimu

Quand’è n’eramu sempre une pochi. 

A sapiamu ch’ella capiterebbi

A sapiamu

Malgradu i sforzi di quelli scemi intricciati è cambiarini

Di quelli utupisti

Avia da finisce cusi’

Utopie eranu

 

Ma finalmente

Pensenduci

Chi' libertà, n’hè

Hè vera ch’ùn la pudete sapè chi’ mi fermu solu

Chi’ libertà

Nimu mi sente

Nisunu mi capisce

My name is Nobody

Possu mughjà

 

« Aioooooouula chichirighì

Merda pullì

Che vo sterpete »

 

Nunda

Chi’ libertà

 

Un si sente un zittu

Ghjè u silenziu di l’inesistenza

Cum’è quandu Dio era solu in u niente

O u niente senza Dio

Chi' ne so’

 

Possu ancu cantà

Eo ùn aghju mai avutu u curagiu di cantà.

Avà sì.

 

« O Catali

Ma cosa faci in Niolu

Gallu sturzu è u springhjolu

Un ti riminà cusì

Granada, tierra soñada por mí"

 

Indifferenza

Hè quant’è s’eo ùn ci fusse

Hè vera ch’ùn ci so’ quasi più

Ultimu Muhicanu

Hè quant'è s'ellu ùn ci ne fusse mai statu

Muhicani

Solu cani

 

« Euuuuu

Quale vo siate

Ci passerete ancu voi in u franghju

Ci passerete

Un sterete tantu »

 

Seranu finiti in u franghju ancu elli ?

 

Chi’ superbia, mì

Fidighjate a superbia di issi bastardi

S’ell’i mandessimu unu in u niente ancu elli

Ch’ùn sò altru chè bastardi

Ma innò

Elli si fermanu in u tuttu

E eo in u niente

S’anu pigliatu u mio fornu

Sò Basterdi

E eo mi fermu dunque solu u leghjitimu

 

So’ solu cum'un cane chi’ ghjè solu

Aghju da finisce in u franghju

Incù a so macina chi’ gira

Oliu seraghju

È elli so’ seranu olietta

 

« Un calate più la chjoma

Chi' tantu sott'a sta soma…"

 

Ci sò, ci sò mì, ci so’ in u niente

Qualcosa sentu

Ma nè sentenu nè ascoltanu nè s’accorghjenu

Ci so’,

Ma muti è sordi

 

A pensalla l’ultimu Mohicanu hè liberu

 So’ liberu

Leccu, liberu è leghjittimuch’eo seraghju

In u niente in u niente cascherà à elli

Face paura

Seremu tutti franghjati

 

Seraghju solu un spiritu

Spulpatu

Liberu liberu

Finalmente

 E permanente

Ùn vi puderaghju mancu fà mottu ch’ùn ci site più