Cronache di Petru Mari
2018-01-24 11:53:37

U Mondu di e Meraviglie

 Ma tandu, sì u mondu, sensu propiu ùn ne hà, ch’aspettemu per inventaccine unu ?

L’hà detta Alice, quessa.

Alice, quella di u Paese di e Maraviglie.

Ete vistu ? A Corsica s’addunisce pianu pianu è s’impunta per esiste malgradu a Francia. Pocu à pocu ci seranu tutti – o quasi- à manifestà contru à issa rettitutine detta republicana, primurosa di cancellà e culture è a bocca amara d’un populu. Ghjè una trinca anticogna è cunservatrice di l’idea republicana. A republica ùn hè Francese, hè di tutti quelli chì a s’inventanu. Ancu a nostra hè, chì l’avvene chì ci appartene serà fattu di republica è di demucrazia.

Alice, Alice… Serà u Mondu di e Meraviglie ?

Sabbatu a Corsica prubbabbilmente s’addunisce contru à l’indifferenza di Macron rispettu à a nostra ricunniscenza.

Ricusu, ricusu, d’un paese ch’ùn sà dì chè di nò è chi’ ci forza à ottene di sì. A vuluntà d’un populu ùn si para. Republica ghjiacubbina o micca.

Un altru sabbatu, a Corsica si muverà per difende a Catalogna chi’ bisognu ne hà.

Per tutti l’altri sabbati ùn si sà ancu.

Ricusi ricusi…

Volenu ch’omu sia tutti pari rispettu à listessa lege.

In fatti, tutti listessi.

Tutti listessi, ghjè quessa l’Universalità pseudo republicana. Invece ch’eo simu tutti diversi è ghjè per ciò chi’ u mondu hè bellu. Tutti pari simu, ma singulari, ognunu diversu cum’è e grane di a melingrana.

U mare hè bellu per ogni piccula candella chi’ u forma.

U Mondu di e Meraviglie.

Alice s’inventa a Lege Fiscale, a Cullettività unica, a creazione di l’autonomia energetica, una vera reta di trasporti, una agricultura chì dà à manghjà à u populu di quì, una lingua perenna. So’ quessi l’elementi di l’Ugualienza à a quale cum’è noi, tutti puderianu accunsente.

Ancu i Corsi ghjunghjiticci chjamati à agradicassi quì.

Avà a nostra isula hà fattu un passu versu Alice.

Minutu, forse, ma un passu quantunque.

Hè capita, cum’è tutti i populi, emu bisognu d’una guerra per cuncultacci, per chi’ ogni tantu a Furtuna ci favurisca.

Ci seremu dunque à dimustrà a nostra anima in carrughju i sabbati isulani. Ùn mancheranu chè quelli chì, palisendusi reazziunarii à ciò ch’ellu dice u Populu Corsu, si sò impetrati in u cunservatismu. E smariscenu, ingulliti da u tempu ingordu.

Si pò capì.

U cunservatismu nasce da una paura iraziunale di a demucrazia, ch’elli piglianu per demacugia.

A so mente hè sterilizata.

Da manifestazioni à pruteste, a lite trà Corsica è Cuntinente Fran-cese ùn hà mai cessatu. S’hè rinnuvata à ogni epica in diversi modi.

Dura, dura è cresce.

Issu mondu hà un rigiru ch’ùn ci và ? Inventemucine un altru, dice Alice à l’entre in u Paese di e Meraviglie.

Ma hè difficiule. I primi passi d’Alice in issu mondu novu so’ inquieti, ùn ci capisce più nunda, hè in crisa. In crisa d’identità per u fattu, ma in crisa di u sapè dinù : ci vole ch’ella si scorde di tuttu ciò ch’elli l’anu ficcatu in capu per capì u mondu novu natu d’un apparente chaos.

U mondu assurdu di e Meraviglie chì ci aspetta.

Ghjè un locu induv’omu cuntesta l’ordine stabbilitu impostu da « u mondu veru ».

Veru, ùn la sà, Alice, ma incapiscitoghju, hè certa.

Unu o l’altru sabbatu seremu tanti, forse, à fà i primi passi, in issu mondu assurdu ma liberatoriu, di e Meraviglie.