E cronache di Petru Mari : "à l'ombra di u Fujiyama"
2017-07-12 11:10:34

Eo sto’ à l’ombra di u Fujiyamà. è mi n’enfuttu… 

Mi n’enfuttu mi n’enfuttu mi n’enfuttu.

Perchè u Fujiyamà?

Perchè chi’ da u mio purtellu vecu u sole chi’ tramonta d’aretu à u Fujiyama.

Venite incù me à ombria ?

Bù quant’eo mi n’enfuttu…

So’ giurnalistu è di l’infurmazione mi n’enfuttu,

Di e nutizie

Mi n’enfuttu.

Eo sto’ à l’ombra di u Fujiyamà.

Venite incù mè ?

Vi tengu a scala

Vi tengu a scala

Arippiccatevi puru nant’à i chjassi di a muntagna sacra,

Vi tengu a scala.

Un abbiete paura chi’ simu à l’ombra di u Fujiyamà.

Venite incù mè ?


Mi n’enfuttu tantu chi’ mi n’enfuttu d’infuttemine.

Per u fattu, mi n’empippu di « la fête des voisins »,

Tantu quindi in issa solitutine orientale, sè tù ùn si tù chi’ m’accumpagni, vicini ùn ci n’hè.

Furtuna, incù tutta issa ghjente chi’ si face u musu casca in d’incanti.

Quand’elli si facenu u musu i vicini, di a scalinata, chi’ bellu spessu, ghjè guerilla permanente.

Plicchi, plicchi, à chi’ ùn la ci face à dorme per una candella d’acqua chi’ fala nant’à u suffittu. O allora, tacchi, tacchi, tacchi, ghjè a bacasgia chi’ stà sopra, ch’ùn si toglie i tacchi ghjunta in casa. Quand’ellu ùn hè u canucciu di sottu chi’ passa e meze ghjurnate à abbaghjà, per nunda, in e scali.

Allora mi n’enfuttu.

A capite avà?

Mi n’enfuttu chi’ sto’ à l’ombra di u Fujiyama.

Venite incù mè ?

Eo manghju e beiu, di u restu mi n’enfuttu.

A mè chjamatemi mi n’enfuttu.

Mi n’enfuttu hè u mio nome.

I vicini ? Quand’elle nascenu e lite à voce rivolta, meza bastunata. Hè segnu di vita. U più spessu hè silenziu. Faccie tetre, musi imbugnati, à pena s’elli si salutanu d’un murmuru o d’un segnu di testa quand’elli si crocianu pè e scali.

A ognunu li trica l’ora d’andà à chjodesi in u nidu di a so casa, prutettu in l’intimità di i so muri, annichjatu è fora di u mondu, à gode di a televisione.

So’ impiaghjati.

Quand’ella hè cusi’, so’ morte e lite, l’ultimu segnu, puru negativu, di vita suciale.

Ma tantu mi n’enfuttu, facciu per di’.

Venite incù mè ?

Venite incù mè à l’ombra di u Fujiyama, in a pace di u mi n’enfuttismu, pusatu à fidighjà u mondu.

Qui’ vicini ùn ci n’hè, simu soli è fidighjemu u spetaculu di quelli ch’anu impiaghjatu è ch’ùn si n’enfuttenu micca.

Aio’, femuci una manghjata inseme à l’ombra di u Fujiyama.

Veni cù mè.

Ghjè intornu à u pezzu di u pane ingutuppatu di silenziu, ch’ella nasce a fratellenza.