E cronache di Petru Mari
2017-08-01 09:52:51

In Thimphù mai più

I viaghji, i viaghi

I t’aghju da dà eo i viaghji…

I viaghji o scimo’ aprenu l’appitittuè chjodenu qualcosa d’altru. 

Ma ùn so’ cosa.

A prova si n’hè: pocu fà sò andatu à u Bhutan incù un amicu. U Bhutan…u Buthan alo’, issu picculu paese di l’Himalaya incastratu trà u Nepal è u Tibbè. 

A’ quattru mila metri d’altitutine.

Un so’ micca chjachjare. 

Si secca di fretu. Ùn nasce un filu d’arba…

Simu ghjunti à cavallu sin’à l’aereuportu di a capitale, Thimphù.. Iè, si ghjunghje solu à cavallu incù e mule chi’ avio’ ùn ci hè. 

Nè trenu, nunda. 

Ma anu fattu quantunque un aereuportu, per più tardi, soca. 

Ùn si sà mai. 

E mule è i sumeri vi cappianu à l’aereuportu. 

Dopu francatu u postu di pulizza è a dugana, simu stati accolti. Una accolta simpatica. Omi è donne ci fidighjavanu inc’un surisettu misteriosu. 

E donne di u Bhutan sò chjuche chjuche. Una decina di Bhutanelle ci à datu i fiori è un pachettu di mutz . Ghjè a pastizzeria lucale. Dopu emu fattu per andà in u centru di Thimphù. Ma à l’usciu di l’aereuportu in legnu ci aspettava una quindecina d’omatali. 

Sò tamanti l’omi, culandi. 

E’ tutti duganeri. 

Issi Bhutanoni si sò avvicinati, ci anu chjappu e mutz chè n’aviamu è a s’anu manghjate elli. 

Cum’elli eranu facciacce l’emu lasciati fà. 

Infine, simu ghjunti in piazza à a gara. Iè, anu custruitu una gara in legnu vicinu à l’aereuportu. Ma treniùn ci hè. A  gara l’anu fatta per più tardi. Ùn si sà mai.

Ma ci hè un caminu di ferru, ci hè. Ghjuverà ancu ellu più tardi, soca. Si seranu detti ùn si sà mai. 

Da a gara partenu i sumeri  pè i paesi  luntani à purtà e prechje. 

A cavallu. 

I sumeri capicalati viaghjanu à mezu à e duie raglie, carchi di sacchi di prechje.

In piazza à a gara di Thimphù, a capitale di u Bhutan, ci hè una chjesa bleue. 

U Bhutan… 

Issu paese mischinellu di l’Himalaya, pè e parti di u Neppal, u Tibbè, Petra Zitambuli, custindi, induv’elli campanu ghjente faccigialli. 

A quattru mila metri d’altitutine. 

Si secca di fretu, ùn nasce un filu d’erba.  

 

Dunque, in piazza à a gara di Thimphù, una gara senza treni, ci hè una chjesa bleue, incù affari chì giranu, spezie di rutuloni. I facenu girà in preghera per aricumandassi à a SNCF, una divinità preputente incunnuscibbile per elli ch’ùn l’anu mai vista. Ghjustu imaginata in un schizzu di fantasmaguria infrebbata.

U ventu cutratu soffia in i stracci appiccati à arburi ch’ùn esistenu, face vulà e rote rosse arancione di l’omi capipilati chì correnu spapersi. 

Mughjanu, chjamanu un Dio-Trenu ch’elli ùn ponu cunnosce: 

       — O Louis hè ghjuntu u trenu di ondeci ore è quaranta cinque? Inno’? Preghemu… 

In a so lingua benintesu. Eo a vi traducu issi detti in Corsu, fidu à e spiegazioni di u Presidente di u Sindicatu d’Iniziativa chi’ ghjè à tempu secretariu è spazzinu. Iniziative ùn si n’hà mai pigliatu, ma u Sindicatu l’anu fattu. 

Per più tardi ùn si sà mai,

Anu pensatu.

 

Di quandu in quandu si piantanu di corre è si impalaficchehjanu d’avanti i issi rutuloni. Tandu, e rote rosse arancione si calmanu. D’una puntata di manu, facenu girà u mulinu di e preghere è si pichjanu in pettu murmurendu « hè colpa mea, hè colpa meahè colpa mea, ghjè a mio massima colpa ». 

Mi sò avvicinatu, per dumandà à Shlaffenziegot, Shlaffenziegot, ricurdatevi, u presidente di u sindicatu d’iniziativa chì mi paria troppu grassu pettu à issi disgraziati chi’ patenu a fame.  

  • Ma hè colpa vostra di cosa ?... 
  • Umbè !  m’hà rispostu. È chì ne so’. Dumandanu un pardonu à a SNCF . Ma issu populu disgraziatu di u Buthan ùn aspetta risposta. Facenu quantunque a dumanda listessu. Per più tardi ùn si sà mai.

E u rutulone di e prighere girava, girava, è l’omu dicia “hè colpa mea, hè colpa mea », è eo dumandava « di cosa, di cosa », è ellu rispundia « ùn la sò, ùn la sò ». 

Vicinu à a gara vendenu i fanti calli calli nant’à banchi di legnu. Calli, dunque umbuli. Quand’elli sò ghjalati sò duri. I fanti, sò spezie di fritelle nere, oliose, impastate incù a farina di…Infine, sai sò a farina ch’elli adopranu. Forse ùn hè mancu farina. Ponu ancu esse spezie di mutz fatte incù u ghjessu di u Nepal. 

I fanti, sò u manghjà preferitu di e Buthane è  à tempu un elementu d’architettura. 

Vi ghjurgu ch’ella hè vera. 

Quand’elli sò secchi, i fanti (è ancu e mutz) l’adopranu per fà i muri di e so case. N’hè natu ancu u nome d’un paese, in a periferia di Thimphù: Casamutz . 

È u prezzu !  E’ u prezzu di isse fritelle oliose nere nere vindute à Thimphù a capitale di u Bhutan, piazza à a gara di legnu senza treni, d’aretu à a chjesa bleue, duv’eo era incù un amicu pocu fà ? U prezzu vulete? Face ride. Nunda o guasi. Pè u nostrum budgetum d’eurupeu, costanu trè centimi. Trè centimi ! È ancu, e grandi. Perchè chì ci sò e grandi è e chjuche. E chjuche sentenu l’aranciu, sò legere. 

Dicu l’aranciu, ma aranci ùn ci nè. 

Cosa serà statu issu odore ? Umbè…

Traghje un ventu cudratu, ùn nasce un filu d’erba …

Infine, ci hè qualcosa chì sente l’aranciu bizaru in e chjuche e fritelle buthaninche. Pè issi lochi ùn ci hè nunda nunda nunda. Mi dumandu cum’elli anu inventatu issu sapore d’aranciu per mettelu in e chjuche. 

Eo mi n’aghju chjappu duie chjuche, calle. U m’amicu avia di più appitittu chè mè. Si n’hè compru duie grandi. E grandi ùn sentenu micca l’aranciu. Anu gustu di casgiu. Casgiu fintu, benintesu chì casgi ùn ci n’hè custindi. 

Un fretu !..

Anu gustu di fintu casgiu e fritelle Buthane tamante. Mi dumandu cum’elli facenu à dà issu sapore. 

Hè fintascienza issu fintucasgiu. 

Aghju dettu à u m’amicu : « ma cum’hai da fà à finiscele tamante elle sò ». Avia ragiò di fà a dumanda. Ùn l’hà pussute finì, ingurdone.

 Ci simu alluntanati, pruvendu di dì mersi’ in Bhutanese,  à e rivindarole, ma ùn anu capitu. Si sò messe à mughjà « Malawinà ! Malawinà ! », sgradichendusi i capelli è tirenduci à pressu e fritelle e più secche, dure quant’è a petra. Anu cridutu ùn sò cosa isse Buthane. Simu fughjiti in gara. 

Emu avutu ghjustu u tempu di piglià u sumere d’ondeci ore è quaranta cinque. 

Isse cutrure è isse fritelle periculose principiavanu à facci cacà. 

Un fretu ! …

Bramavanu i dolci paradisi marini mediterranei. 

Simu andati in Phenicie. 

A Phenicie.. A Phenicie alo’ !.. Ùn mi dite chè vo ùn sapete duv’ella hè a Phenicie..

Ghjè unu di issi paesi Ellenichi, a Grezia, Mikonos, duve i sullati portanu e rote bianche, cum’è e donne. Hè certa chì, ùn facenu micca paura i sullati di Phenicie. S’elli sò attaccati da i scucorzeri à cavallu Turchi è arabbiati, Dio ne libari, hè carnugliu. Nasce u scappa scappa cum’è e galline in pullinaghju. 

Avà tagliemula à l’accorta chi’ mi vene una tossa ingattivita d’un cataru. 

Hè statu u fretu di Thimphù.

Mai più mai più…

Infine chi’, simu scappati è ghjunti in Phenicie. Ghjera a festa naziunale. Sò patriotti assai custindi. I sullati incù i so frù frù anu cantatu tutti inseme l’innu naziunale incù a curatella chi’ li trimava.

« Phenicie, ella si » dice u ripigliu cantatu da sullati in rotuccie bianche, gonfii d‘emuzioni varie. 

Ma ancu a Phenicie ci dava noia. 

A sucietà hè troppu militarizata.

Emu finitu e vancanze à Garmischpartenkirchen.

Mi pudete fà una tisana di rosumarinu ?