E cronache di Petru Mari
2017-08-08 10:24:23

Islanda felice

Emu da andà in Islanda ist’aprile.
Incù i fratelli Cartigienica.
So’ d’origine meridiunale .
U sud di u sud di u sud.
Si dicenu « fratè », 
Cum’è e bande di u Sporting. 
Si tenenu caru, 
Troppu forse.

L’Islanda. 
Un fretu, ùn nasce un filu d’erba, 
Hè notte pagna per sei mesi.
Hè certa chi’ simu quasi à trè chilometri da u Polu Nordu.
Capite ?
E muntagne scrachjanu focu. Ci hè duiecentu vulcani. 
Anu certi nomi…. Da scughjassi a cannella dicenduli : u Reykjanes, l’Öræfajökull, u Snæfellsjökull, u Vatnajökull 
A terra Islandese hà a malatia di Parkinson: trimuleghja sempre. A polpa di i fratè dinù. 
Quand’elli seranu à u pede di u Mýrdalsjökull trimuleghjeranu anu di più.
Hè per ciò ch’elli volenu andà.
Per trimulà.
U Sporting ùn li basta più.

I fratelli Cartigienica si volenu mette à cavallu à a dursale Medio-Atlantica. Ghjè un termine di geulugia.
Un ci capite nunda ma vi spiegu listessu.
A dursale Medio-Atlantica, ghjè una muntagna sott’acqua chì traversa l’oceanu Atlanticu da cima in fondu è da levante à punente. Partendu da l’America issa muntagna ne inticcia una altra chi’ parte da l’Europa. 
In u scontru, nasce u fragu. 
Trà e duie muntagne sottumarine, ghjè una lite tettonica ch’ùn si firmerà mai.
Un so’ micca chjachjare. Un simu micca in u Peloponese custi’, u Peloponese incù tutte isse feminette.
A battaglia trà e duie placche sottumarine sichjama a tettonica di e placche. A tettonica di e placche ghjè cio’ ch’hà fattu nasce e surelle Pignatta. Duie sculgioni spaventosi. So’ d’origine meridiunale.

U sud di u sud di u sud. Hè certa ch’ùn simu più incù isse feminette di u Peloponese.

Vi spiecu.
Ghjunta in Islanda, a dursale si crepa. Vulcani, Fiumi di lava,
Geysir in Islandese si dice, mansa di sumeri. Si dice Geysir.
Eo, ùn ci vo’ in Islanda. 
Ch’emu da andà à fà in Islanda per crepà di fretu.
Sempre à bughju, 
Ùn ci hè nè ghjornu nè notte, 
A terra hè cutrata, Si sculiscia. 

In u mentre chi’ Les Compagnons de la Chanson a si passavanu beati à e Canarie è ùn sculisciavanu micca.
Quand’elli eranu vivi benintesu.

L’Islanda.
Centuvintimila abbitanti
Tuttu cotru è vulcani, cotru è vulcani, cotru è vulcani.
Quand’è vo ghjunghjite pè issi lochi, sè vo ùn le vi cutrate e vi frighjite.
Quessa spiega chi’ u turismu Islandese abbia u so da fà à allunsingà i bagnenti (o i bagnaroli o i bagnaninchi, o i pan bagnà, umbè chi’ ne so’.
Infine, quelli chi’  li piace à fà u bagnu).
Fà u bagnu iè, ma micca in un mare incù u cotru chi’ si spezza à u veranu è s’appiccica à è palle. 
I soli chi’ so’ cuntenti so’ i militari Americani di a basa di Reykjavik. Mastucanu scingomi fendu lucicà à l’infinitu e so bombe termonucleari incù pelle di castoru, aspettendu senza troppu credeci a terza guerra mundiale. Cuntemu ancu quattru o cinque pazzi di pesca à u baccalà digià salitu è avemu definitu u populu islandese sanu, bramosu di carpighjà  u permafrost di a so terra matrigna..

In cunclusione, 
I fratelli Cartigienica è e surelle Pignjatta, dicenu chi’ l’Islandesi so’ ghjente chi’  si meritanu d’esse cunnisciuti megliu.
Invece chi’ Les Compagnons de la Chanson inno’.