Cronache di Petru Mari
2017-09-12 11:29:46

 Un ci hè più solli

Un ci hè più solli, ùn ci hè più solli. Gilles è Jean-Guy a dicenu à chi’ vole sente.

A Francia ùn hà più solli. 

I nostri deputati so’ andati à ùn dumandà nunda à u guvernu chi’ hà accettatu. L’anu dettu ghjustu ùn ci rumpite più e stacche à lasciateci fà postu chi’ noi vulemu fà.

Edouard Philippe, Gerard Philippe, o sai so’ cum’ellu si chjama u primu ministru, hà rispostu « fate cum’ella vi pare tantu ùn ci hè più solli ». Un ci hè più solli pè i piscadori, è mancu pè i pesci. I sghei so’ finiti per l’agricultori, so’ nant’à u compie per l’agricultura. E casce di ritirata perdenu chi’ so’ so’ tufunate. E casce di malatia so’ malate. I senza travagliu so’ senza dinaru, u dinaru hè senza valore. 

Hè finita a manna.

Marianna ùn ci dà più à sughje. 

O più pocu.

Un hà più latte.

Hè secca.

Allora chi’ femu ?

E sè no u ci pigliassemu di ribattu, à Sefero’, ùn lu senteremu più.…

Sefero’ ! 

Aio’, Sefero’!

So’ più di dui seculi ch’elli ci dumandanu ogni quattordeci lugliu sè no’ sentimu sempre in e nostre campagne, « mugir, Sefero, ce soldat ».  

E bè, Sefero’ à a fine puderà chjirlà quant’ella li pare, sè a funtana hè secca, hè secca. Invece di mughjà in e campagne puderà sempre cullà à « siffler la haut sur la colline » è aspettà à Gilles è à Jean Guy « avec un petit bouquet d’églantines ». 

Tantu, noi l’averemu vultatu u capu. 

Autre temps autre nurse. 

Ci circheremu un altru puppulu per sughje, per pudè cuntinuà à di’ ch’ellu canta u puppulu Corsu incù u latte di l’altri. 

Iè ma qualessu ? 

Chi’ puppulu hè pienu abbastanza, incù i so capitinghjuli incurdati, per nutricci ? 

Almenu…

Aspettate, almenu chè no’ ùn provimu di buscà a notra pruvenda à di per noi. Serebbi ancu u megliu, ch’emu d’andà à circà a limosina…

Intantu, per avà ùn ci hè più solli.

Un ci hè più solli, ùn ci hè più solli. 

Femuci, per compie, issa dumanda finale: ci vulerà à sigà a penda nantu a quale simu calati male ?