E cronache di Petru Mari
2017-10-17 17:06:43

In u RER

Parigi

Una mama giovana in u metrupulitanu regiunale.

A guardu chi’ fideghja a so figliola di trè anni in collu.

Li spiega.

Li spiega qualcosa incù pacenza.

Un sentu cio’ ch’elle si dicenu.

Ma a criatura ride.

E quand’ella ride, ghjè un sole.

U metropulitanu si pianta in a prima stazione. Avà a sentu a dumanda ch’ella face à a mama: « chi’ ghjè issa cosa ? », indittendu u vetru. A mama prova à induvinà cio’ ch’ella averebbi da vede. Ma ùn vede : « ghjè una casa ? ». « Inno’ o mà». « Un pannellu ? ». « Inno’! ». « Un aggrottu pè i viaghjadori ? ». « Ma inno’, guarda bè », risponde a criatura cù un toccu d’azizume.

Li scappa a pacienza, si percepisce.

A mama finisce per chereli cio’ ch’ella dumanda, di cosa ella parla propiu ch’ùn la vede. Si dicerebbi ch’ella vole sapè, prima ch’elle principiinu à letica.

A figliola risponde incù nerbosa, : « Què ! Què ! Cio’ ch’eo vecu qui’ !  Chi’ ghjè ? ».

Aghju avutu a voglia di ride.

Ancu a mama.

U ditucciu indittava u vetru : « qui’ nantu à u vetru, chi’ ghjè ? »

« Ah ! » Face a mama sullevata.

Ci era un graffitti’ nantu à u vetru.

Ghjera quessa ch’ella mustrava a criatura è chi’ a mama ùn vidia, puru avendulu sott’à l’ochji: a so imagine spechjata nant’à u vetru, cancellava u graffitti’ chi’ a criatura ella avia d’avanti à l’ochji.

In u metro’ e fideghju treminduie, a figliola à cavallu nantu à è dinochje di a so mama.

A mama li parla incù una eternità di pacienza. A figliola ride raghjendu u sole di i so trè anni.

Soca penserà chi’ mama hè imbambulita.

Quant’è tutte e mame.

Trà elle duie ùn si capiscenu.

Accade ancu à noi, adulti, quand’ella ci vene difficiule di vede cio’ ch’elli vedenu l’altri è noi micca. Purtantu hè listessa realità, ma fidighjata incù ochji diversi è mente cuntrastate.

Cum’è si’ u mondu sanu ùn era listessu per tutti.

Listessu mondu, ochji diversi chi’ spazzanu un decoru ch’averebbi da esse cumunu, ma ch’ùn hè.

Nascenu malintesi, lite,

Battaglie, guerre.

E s’o pigliassemu u tempu di di’ à l’altru cio’ ch’omu intende è ch’ellu ùn hà l’arte nè di vede nè di sapè ?

E s’avessimu l’intelligenza di stà à sente à l’altru cio’ ch’ellu dice, ascultendu è appaghjendu duie facce chi’ guardanu listessa cosa, ma una à ombria l’altra à sulana.

Una cosa d’una uguale è purtantu diversa realità.

E s’o ci cugliessimu à Pegase, u cavallu cù l’ale.