E cronache di Petru Mari
2017-10-24 11:35:37

Musica Maestru

E s’o parlavamu di a vita, di a morte, et Dieu dans tout ca.

E s’o ci pigliavamu una bella pena in capu.

Dicu cusi’ perchi’, pensava à a vita l’altru ghjornu, spassighjendumi, pensosu, incù u mo fiatunettu in manu. Mi dicia in pettu: s’elli mi dumandassenu di fanne una definizione in quattru parulle di a vita, cosa puderebbi di’ eo ?

Umbè…

Lasciatemi riflette.

Finalmente si puderebbi spiecà chi’ a vita si scumparte in trè fasi : rivuluzione, riflessione, televisione. Si principia vulendu cambià u mondu è si compie cambiendu di canale.

Incalamitati d’avanti à issa televisione di merda.

Voi, vechji,

Quand’è v’erete giovani si’ chi’ u vuliete cambià u mondu.

Svuciaravete pè i carrughji :

« N’emu una techja di coglie e castagne, di i brilluli è di a cerminata !. Vulemu parte à cambià u mondu ».

E vi site ingagiati in l’armata. Per andà à cambià u mondu…

Di l’altri, u mondu di l’altri.

Ma tonkiki ma tonkinoise…

Musica maestru !

In u mentre chè vo cambiavete u mondu, in altro’. U vostru mondu qui’, si firmava tale è quale.

Un vulia cambià, ellu.

Un vulia mutà.

E nuvità chè vo arrecavete da u mondu di l’altri cambiava u nostru, per disgrazia. Grazia à voi, ete fattu mutà a Corsica à colpi di pensioni, d’emigrazioni à l’arsenale in Tulo’, nant’à i battelli in Marseglia o l’ospidali in Parigi, à pulisce e cacagliule. Voi, l’ex capurale sceffu….

A javà elle était née une poupée…

Musica Maestru

E eccuci qui’ ista sera.

Eccuci qui’ inseme, voi vechju, eo sempre giovanu, à piglià a ciccia d’avanti à TF3.

Eo à lacatemi stà, voi à l’Academie Star.

L’amaru qu’on voit danser le long des golfes clairs…

Musica Maestru.