A Corsica à u festivale di u libru in Brittagna
2017-10-26 10:05:45

U Festivale di u libru in Brittagna serà presidatu da Jean-Guy Talamoni, presidente di l'Assemblea di Corsica, sabbatu u 28 d'uttobre, ind'a sala Glenmor di a cità di Carhaix. L'autore Jean-Jacques Andreani, specialistu di e legende corse, animerà à 2 ore una cunferenza nant'à l'orchi. Antoine-Marie Graziani hà da prupone un'altra cunferenza nant'à a storia di l'isula è e so rilazione cù u Mediterraniu à 4 ore.

A 3 ore è mezu, à u cinema "Grand Bleu", Hervé le Bihan presenterà u situ internet devri.bzh, veru dizziunariu brittonu, messu in usu da Martial Ménard. A 4 ore, Marie Le Gall riceverà u premiu di a nuvella in brittone è di u Rumanzu pè "Mon Étrange sœur". Spettaculi di giovani in lingua brittona sò previsti dinù sabbatu è dumenica à 4 ore è mezu. Infine, stu 28u Festivale hà da urganizà, dumenica, un dibattitu nant'à e lingue dette regiunale.