Cronache di Petru Mari
2018-01-30 11:42:12

Dormenu, i pinzachji rossi

I rossi attaccanu à Aiacciu, avianu dettu.

Hè finita.

Sì i rossi v’attaccanu in Aiacciu, ma attaccanu in veru, ùn pudete resiste. Mi dicerete, s’elli attaccanu in Veru, Aiacciu ùn teme nunda. Hè piuttostu, dunque propiu, in Veru ch’elli capiteranu i danni.

È poi, ch’anu d’attaccà à fà in Veru, s’ellu hè Aiacciu u scopu?

Ma i rossi, attaccheranu Afà, attaccheranu in Veru o attaccanu in Aiacciu?“.

Innò, nè in Veru nè in Afà. In Aiacciu …

Voi chì ascultate issa cronaca - è ch’ùn site Aiaccinu-, a sò, vi dumandate: « Innò. Ghjè Aiacciu ch’hè pigliata di mira da i rossi. A dice a vuciata ». È spieca – a vuciata- chì sin’ora i rossi facianu nece di dorme, ma u vermu era digià dentru à i palmi è s’era impatrunitu di a Piazza Foch. Innò ch’ùn stò parlendu di Paul Antoine. Una, ellu ùn dorme è piglia pesci.

Parlu di i palmi di a Piazza di i Palmi è di u pinzachju rossu. U “charançon rossu” s’ella v’aggarba megliu. Si sentia dì chì issa varietà di pinzachju (ghjè un vermu in fatti) si manghjava a a Piazza di i Palmi. Ùn ci mancava solu quessa.

Dopu à u balaninu di a castagna, u cynips di u castagnu, “l’aleurode floconeuse” di a clementina, a “cochenille” Cinese chì si sterpa tuttu, cinquecentu sessanta famiglie di puci è u cancaru di e frondi, ùn ci mancava più chè u pinzachju rossu per manghjassi i palmi, chì danu à Aiacciu issu toccu d’esutisimu chì face chì, tuttu essendu quì, vi cridete in altrò.

È avà pensate: « ghjè un addisperu » è ete ragiò. Tutte e cuderzule è i mignoculi di a creazione finiscenu in Corsica à ghjucacci contru. Ma chi’ ci truveranu in a nostra isula ?

Cumu difendesi ?

Ghjè impussibbile. Ma eccu chì Tumasgiu Brunelli ci dà una bona nutizia. Ùn hè u pinzachju rossu, incù u so cultellu strettu in bocca, à manghjassi i palmi di a Piazza di i Palmi, ghjè un fungu, un fungu meschinu scarzu è spugliatu chì l’infraceca, i palmi, quandu umidità è calore s’associanu.

Si chjama u fusariu. È u fracicu natu di issu fungu, a fusariosa. Ghjè una spezie di buletru nustrale, fora chì ùn simu noi chì u manghjemu, ghje ellu chì si manghja à noi.

Meza bastunata quantunque.

Ci vole à ricunnoscela. Lascemu dorme i rossi. I pinzachji rossi. Andate puru chì, quand’ella ghjunghjerà a so ora si disciteranu ancu elli.