Cronache di Petru Mari
2018-02-13 11:35:55

L'omu cummanda

Di novembre a ghjurnata hè cunsacrata à dinunzià a viulenza contru à e donne.

L’origine a sapemu.

Frà altre spiegazioni, più pulitiche, ghjè a sucetà patriarcale chì sottumette a donna à l’omu è da l’iniziu hè cusì, ùn fate u musu, hè cusi’.

U Creatore ùn hà fattu l’omu, è micca a donna ? Eva l’hà creata dopu, in cumplementu, en supplément gratuit offertu da u Paradisu, ghjuvendusi di u mudellu di l’omu.

È s’ella fusse stata altrimente ?

Vogliu intende u cuntrariu…

Tenì, imaginemu…

Giardinu d'Eden. Trè settimane dopu à a Creazione.

Ondeci ore di mane, l’ora a più bella in Eden.

U Signore s’affacca à passu tranquillu per fà mottu à a prima donna : « allora, cumu vanu l’affari o Eva ? ».

È Eva: "Un incantu o Signore. Ghjè tutta meraviglia intornu à mè. L’albe sò splendori, i tramonti bellezze serene, u giardinu un bracanime di culori percorsu di prufumi ch’imbriacanu.

D’altronde, ùn ci fate casu, ma sò briaca…

Tuttu hè bellu. Cum’averai fattu per pensà una tale bellezza?

Ma, ci hè qualcasa ch’eo ùn capiscu. Un hè per criticà a vostra opera o Signore, mancu à pensalla, ma quand’eo mi fideghju; issi petti chè tù m’ai fattu, incù trè puppule, più và è più mi pare ch’ellu sia un sbagliu, no ? U senu quellu à mezu hè incagnatu, guarda cum’ellu hè incagnatu. E duie tette laterali schizzanu ar’ di fora per truvà un pocu di piazza è quella à mezu pende chi’ ghjè floscia. Pargu una pompa à essensa. In più, quand’eo viaghju mi sgrafiu nant’à i rami bassi.

Per falla corta, issu terzu senu à mezu, sè tù mi voli fà un piacè, cacciamilu. »

U signore a guarda, pensa, è risponde : "Stà à sente, hè ghjusta ciò chè tù dici, ma sai, ghjè a mo prima creazione. J’ai tattonné. Pè i puppuli, quantu n’aghju datu à l’animali digià ?... Sei ? Pè a donna m’hè parsu di duvelli smezà.

Ma, ai ragiò. Aghju da curege subbitu ».

U Creatore allonga a manu è d’una carezza caccia u senu di u mezu è u ghjetta in un lamaghju. Poi volta u spinu è cuntinueghja a so spassighjata fischittentu Saint Louis Blues.

Passanu una quindecina di ghjorni, è u vechju volta in u gardinu d’Eden, cuntentu d’ellu, dirittu dirittu, a panza in avanti : « cumu stà Eva, a mio più bella creazione ? ».

« In d’incanti o Signore. Ma sai, si vede ch’ella hè propiu a to prima creazione perchè chì e cunnerie l’ai fatte in veru. Guarda tutti l’animali intornu, a pecura hà u so muntone, a vacca u so toru, l’acellu a so acella, a buttiglia u so tappu, a pulenda u so pulendaghju, u cavallu a so ghjumenta.

Tuttu hè accuppiatu, for’ di mè. Mi sentu sola ».

Dio pensa un attimu: "Sai Eva, vengu d’avvedemi chì incù iss’ultima cacata e donne anu d’avè ragiò sin’à a fine di u mondu. Averia fattu megliu di creà l’umanu à l’imagine di mè stessu. Avà per quale hà da passà l’omu…

Lasciemu reghje.

T’aghu da fà piacè, un cumpagnu ti ci vole. U ti feraghju incù una parte di tè stessa.

Videmu un pocu… Induv’ai ghjittatu quellu senu inutile ? »