Cronache di Petru Mari
2018-02-14 12:03:23

I poli cuntrari

 S’aspettanu e vacanze.

A ghjente di u Nordu, incù i so tong cughjosi ùn sterà tantu à parte in banda à impuzzichì u Sud.

È noi chì femu ?

Induve andemu noi chi’ simu in u Sud ?

Simu u Sud, u Sud di tutti issi Nordi chì ci supraneghjanu,

Ci accapuneghjanu. .

Noi simu sottu à elli, simu solu un locu di vacanze.

Ghjè u Nordu, pulitu, organizatu, fretu à essene spaventosu, chì guverna u disordine istericu permanente di u Sud, in un tanfu di sudore è di miseria.

Ghjè u Nordu cuerente chì sottumette u Sud incuerente, impistatu, sfacciatu, cuntrastatu è liticosu in e so varietà .

Vengu d’avvedemine propiu avà di issa ierarchia fatale.

Voi a sapiete digià, forse.

Ghjè u Nordu chì guverna in ogni locu è sempre.

Per u fattu, i presidenti Francesi ùn sò tutti di u Nordu è in u Nordu ? Ete mai vistu un presidente di u Sud entre à l’Eliseu ? È l’Eliseu esse stalatu in Marseglia o in Bouc Bel Air ?

Ghjè u Nordu chì guverna u Sud, in u rispettu di a geumetria chì stabbilisce chì u Nordu hè à l’insù è u Sud à l’inghjò. Geumetria, cusmugunia, una cosa cumplicata ch’hè megliu à ùn entreci. Sappiate solu chì, sì u Paradisu hè quà sù, l’Infernu hè quà ghjò.

A ci anu ficcata in capu seculi di catechisimu, ùn hè per nunda, cridetemi puru… Ghjè u Nordu, quà sù, chì ci rege à noi chì simu quà ghjò. Issa verità s’impone, basta à avè un minimu di sensu di l’osservazione.

Pigliate a nostra persona.

Sò i pedi chì cumandanu, soca ? Inno’, chi’ i pedi sò u Sud di u Sud. I pedi sò u Sud estremu chì suda è puzza.

U Sud micca estremu di a nostra persone induve hè, per voi? L’avete à mezu à l’anche. È u Nordu ? L’avete sottu à a beretta. Ghjè u nostru Nordu, u capu, chì ci cummanda, chì ci tira à l’insù. U nostru Sud, ascosu è tradimentosu, li ghjoca contru.

U cuntrastu hè biblicu.

Accade (per furtuna) chì u Sud vinca a battaglia. Ghjè tandu chì si dice di certe persone, omi pè u più : « quessu pensa incù u minchju »…

Puru noi à u Sud, ci entrimu in a battaglia di i poli cuntrariati.

Puru noi, simu à u Nordu d’un Sud disprezzatu. Un Sud chi’ puzza di vita ancu più chè noi.

Puru noi simu d’un Nordu chi’ sottumette un Sud di miseria.

Puru noi simu d’un Sud,

Chì ci attira, sin’à lasciassici sculiscià ?

Sin’à perdenu u Nordu.

Sin’à vince u Sud.