20 anni di reclusione per Dominique Bellicou
2020-02-05 09:23:01

A corte d’assise di Cismonte hà cundannatu l’anzianu prufessore di scacchi, Dominique Bellicou, 66 anni, chì cumparia in appellu, à 20 anni di reclusione criminale per furzatura nant’à zitella di menu di 15 anni è manighjate nant’à altre giovane. Appena di più chè in prima precura induv’ell’era statu cundannatu à 19 anni di reclusione.


Marchja bianca per Barthélémy Casanova
2020-02-05 09:22:15

Sabbatu l’8 di ferraghju à parte da 3 ore, si ferà a marchja bianca in memoria di Barthelemy Casanova. Eri, a so mamma, Michaela Sindali, s’hè sprimata, ingirata da u sustegnu di i membri di u cullettivu A Maffia Nò A Vita Iè. A cunferenza di stampa hà schjaritu parechji punti, à sapè chì una lagnanza contr’à duie persone identificate hè stata depusitata. L’inchiesta hà permessu di stabilì chì a vittima è i so assassini ùn si cunniscianu micca, è chì ùn ci hè statu nisuna baruffa.

 


Vittoria di l’ACA contr'à u Paris FC
2020-02-05 09:20:26

Grazia à un’efficacità offensiva ritrova, l’ACA hà firmatu eri in Parigi u so dodecesimu successu di a stagione contr'à u Paris FC 1 à 2. Cun 42 punti, l’aiaccini sò stallati à a terza piazza di u campiunatu di Liga 2.


Liga A Volley : un GFCA vincidore
2020-02-05 09:19:18

In Liga A di Volley ball, l’aiaccini anu ritrovu u surrisu, cù a so vittoria in dispiazzamentu in Tourcoing, cuncurrente direttu per i Play-Off (1/3). Una vittoria efficace per approntà in bone cundizioni, u spiazzamentu in Cannes venneri.


Figari: annullazione d'una corsa di vitture
2020-02-04 17:51:56

U merre di Figari hà annullatu a corsa di vitture trà i paisoli di Tarrabuceta è Ogliastrellu, prevista pè sabbatu, chì face parte di u rallye di Purtivechju. Una decisione per via di giri di ricunniscenza di piloti chì sò periculosi pè l’abitanti. Jean-Michel Sauli, unu di i rispunsevuli di u rallye, hè d’accunsentu cù sta decisione. Ellu stessu avia dipusitatu una lagnanza pè fatti simili.


Alerta arancia prulungata
2020-02-04 16:33:29

L’alerta arancia pè a timpesta di ventu Hervé hè prulungata sin’à dumaitina à 6 ore.


Avucati di Bastia in Parigi pè a manifestazione naziunale contr’à a riforma di e ritirate
2020-02-04 10:02:05

Eri in Parigi, una delegazione d’avucati di Bastia hà participatu à a manifestazione naziunale contr’à a riforma di e ritirate. Sta riforma hè esaminata dapoi eri à l’Assemblea naziunale. U cunsigliu di l’avucati d’Aiacciu è quellu di Bastia anu decisu di mantene a greva sin’à u 10 di ferraghju. 

 


Greva illimitata à l’uspidale di Sartè
2020-02-04 10:01:32

Dapoi eri, u persunale di l’uspidale di Sartè hè in greva illimitata. Prutestanu contr’à a mancanza di mezi, e cundizione di travagliu è a mancanza d’ascoltu di a direzzione è di a municipalità.


Incendiu maiò in Quenza
2020-02-04 09:30:44

Un focu hà picciatu sta mane nant’à a cumuna di Quenza è ne simu à quasi 700 ettari brusgiati. Per via di venti d’uveste timpestosi da 130 à 160 ch/o, i mezi aerei ùn ponu intervene è l’incendiu avanza à quasi 2 chilometri à l’ora. I suldati di u focu sò intervenuti dinù pè picculi incendii in parechje cumune di Cismonte è in numerosi settori di u dipartimentu pè ogetti chì risicavanu di cascà.


Nova addunita contr'à a riforma di e ritirate
2020-02-04 09:30:04

L’organizazione sindicale CFE-CGC, CGT, FO, FSU, STC è UNSA chjama à un’addunita ghjovi u 6 di ferraghju à 5 ore davant’à a prefettura in Aiacciu. L’ogettivu hè di dumandà torna u ritiru di u prugettu nant’à a riforma di e ritirate.


Articuli scorsiPrussimi articuli