RIVISTA DI STAMPA
55821 résultats !

Dumanda d'annullazione di i scontri di u 5 di maghju
2019-04-23 17:38:25

U cullettivu di e vittime di a catastroffa di Furiani hà dumandatu à Nathalie Boy de la Tour, presidente di a LFP (Liga di Football Prufessiunale) d'annullà i sconti di u 5 di maghju prossimu. A LFP hà digià annullatu scontri per via di u tempacciu o di i ghjilecchi gialli.


Paul-Marie Mancini ineligibile durante 5 anni
2019-04-23 14:39:49

Paul-Marie Mancini, merre di Costa in Balagna è presidente di l'associu di i merri di Cismonte, hè statu dichjaratu ineligibile durante 5 anni, in l’affare di “l’alloghji rurali”. Un’addunita hè prevista in Costa sabbatu dopu meziornu pè sustene st’omu. Elezzione anu da esse urganizate pè eleghje dui cunsiglieri municipali è un novu merre. Da quì à tandu, a prima aghjunta Marie-Antoinette Martelli rimpiazza u merre.


Prucessu di l'assassiniu di Christian Leoni
2019-04-23 14:37:47

Dui omi, frà quessi, Cédric Courbey, militante di Corsica Libera, cumparisceranu da u 25 di ghjugnu à u 5 di lugliu in Parigi pè l’assassiniu à u mese d’ottobre 2011 di Christian Leoni, membru di a Brise de mer. U FLNC hà rivindicatu l’assassiniu un mese dopu è Cédric Courbey hà sempre nigatu i fatti.


Prugettu d'interru di mullizzu cuntestatu
2019-04-23 14:36:31

Un cullettivu hà da esse creatu pè ricusà u prugettu d’interru di mullizzu in Multifau è ch’ellu sia fattu in altrò nant’à stu territoriu. A ragiò hè chì u situ d’interru serebbe custruitu vicinu à un fiume induve parechji paesi piglianu a so acqua. U 29 d’aprile, ci serà una reunione di tutti l’attori di stu cartulare (Statu, CDC, Syvadec, Intercumunalità).


Ghjochi di l'isule 2019 in Bastia
2019-04-23 14:35:23

Per via di prublemi lugistichi, i 23esimi ghjochi di l’isula si teneranu in Bastia è micca à l’isula d’Elba, da u 21 à u 26 di maghju.


Sparizione nant'à u GR 20
2019-04-23 11:22:51

Un turistu hè sparitu nant’à u GR 20 dapoi eri per via di u tempacciu. Hè partutu da l'Ortu di u Piobu è ùn hà più datu nutizie. Un prublemu di telefunia spieca sta situazione.


Fine di pulluzione in Corsica
2019-04-23 11:22:14

Eri a Corsica sana era tocca da una pulluzione venendu da u Sahara ma, grazia à l’acquate di sta notte, u fenomenu hè sparitu. A qualità di l’aria hè mezana per oghje è dumane.


Eric Verdier à l'università
2019-04-23 11:21:37

Eric Verdier, puntellu di u polu di discriminazione, viulenza è salute, hà digià rializatu duie sessione di furmazione à l’università. U scopu hè d’impedì situazione di fastidiu, d’isulamentu chì ponu sbuccà nant’à depressione o succidi.


Viulenza: dui feriti
2019-04-23 10:38:37

Dui vacanzeri austriacchi sò stati feriti in a notte di sabbatu à dumenica in una baruffa cù un gruppu di giovani. Unu hè statu gravamente feritu è evacuatu versu u centru uspitalieru di Nizza induv’ellu hè statu piazzatu in reanimazione. Un inchiesta hè stata aperta.


L’agenti di a riserva naturale di Scandola minacciati
2019-04-23 10:34:39

L’agenti di a riserva naturale di Scandola anu ricevutu una lettera di minaccia di morta. Una lagnanza hè stata depusitata da u cunservadore di a riserva. A u principiu di u mese di ghjennaghju, una scrizzione cù insulte era stata ritrova nant’à a facciata di a caserna di i suldati di u focu di Galeria contr’à Jean-Marie Dominici. St’ultimu hà ricevutu u sustegnu di l’eletti di a cullettività di Corsica.


Chargement en cours...