RIVISTA DI STAMPA
50338 résultats !

Accidente di camiò in Roccapina
2017-03-23 11:52:03

Un camiò s'hè vultulatu è a strada territuriale 40 hè stata bluccata. Nimu hè statu feritu, solu danni materiali.


Arrubbecciu d'un terminale automaticu in Lucciana
2017-03-23 10:26:12

U terminale automaticu di u Crédit Lyonnais di Lucciana hè statu strappatu, sta notte. Un si sà ancu cumu l’operazione hè stata fatta è quantu soldi sò stati arrubbati. A sezzione di ricerche di Bastia face l’inchiesta.


Schelleru in Londres : morti è feriti
2017-03-23 09:59:41

Eri, in Londres, vicinu à u palazzu di Westminster, 3 persone sò morte è omancu 40 sò state ferite, da un omu chì l’hà inticciate cù a so vittura. Dopu, hà pugnalatu un pulizzeru. A pulizza l’hà tombu quand’ellu pruvava à attaccanne un altru. L’attaccu hè accadutu u ghjornu di l’omagiu di a Belgica à e vittime di i schelleri, un annu fà in Bruxelles. Westminster hè u simbulu di a demucrazia inglese. L’unità contr’à u terrurismu studieghja a pussibilità d’un attu islamistu, è hà annunziatu chì sette persone sò state arrestate..


Schelleru contr'à a sottuprefettura di Corti
2017-03-23 09:58:13

Sta notte, versu 11 ore è mezu, buttiglie molotov sò state ghjittate nant’à a facciata di a sottuprefettura di Corti. Nimu hè statu feritu è l’attu ùn hè statu rivindicatu.


Accidenti stradali in Pumonte : dui feriti
2017-03-23 09:57:28

Eri, una giuvanotta hè stata inticciata da una vittura in Aiacciu. Assai ferita, hè stata purtata à l’uspidale. U cunduttore di quad hà avutu un accidente, eri nant’à a cumuna di Tiuccia. Hè statu purtatu à l’uspidale d’Aiacciu in un statu d’urgenza assuluta. 


3 anni fà, l'assassiniu di Jean Leccia
2017-03-23 09:56:40

U 23 di marzu di u 2014, Jean-Leccia, u direttore generale di i servizii à u cunsigliu generale di Cismonte, hè statu tombu in a so vittura, à a surtita nordu d’Aleria. Trè anni dopu, st’assassiniu ùn hè ancu risulutu è a famiglia aspetta sempre risposte. E figliole di Jean Leccia speranu ind’u novu ghjudice d’istruzzione di a JIRS, a ghjuridizzione interregiunale spezializata di Marseglia, incaricatu di stu cartulare. Anu da dumandà à scuntrallu è pensanu chì a morte di u so babbu hè in leia cù e so funzione à u cunsigliu generale.


Jean-Guy Talamoni ricevutu da u Papa
2017-03-23 09:55:44

U presidente di l’Assemblea di Corsica, Jean-Guy Talamoni, hè statu ricevutu è benedettu da u Papa Francescu, eri in Roma. Una delegazione corsa l’accumpagnava. Hè a prima volta chì un presidente di l’assemblea corsa hè statu invitatu da a Chjesa. Una manera dinù di ripiglià i raporti trà Roma è a nostra isula. U Papa hà prumessu à Jean-Guy Talamoni di pregà pè a Corsica. U presidente li hà rimessu una lettera è una nota storica pè rammentalli e rilazione storiche trà a Corsica è a Santa Sede. Sò state trasmesse dinù infurmazione nant’à a situazione pulitica attuale dapoi chì i naziunalisti anu ottenutu a magiurità à l’assemblea territuriale, di dicembre 2015 è e rivindicazione corse chì Parigi ricusa.


Visita di u ministru Jean-Michel Baylet
2017-03-23 09:54:36

Jean-Michel Baylet, ministru di l’accunciamentu di u territoriu, di a ruralità è di e cullettività territuriale, hè in Corsica oghje è dumane per l’ultimu viaghju di u so mandatu ministeriale. In Aiacciu, sta mane pè una reunione di travagliu cù l’eletti è anderà dopu in Cismonte per signà un cuntrattu di ruralità in Aleria nanzu un ripastu cù l'eletti di Capicorsu. Hà da inaugurà dinù a casa di i servizii publichi in Cervioni. Compierà a so visita in Bunifaziu à a caserna Montlaur.


François Orlandi candidatu à e legislative
2017-03-23 09:53:45

Eri, François Orlandi hà annunziatu a so candidatura à e legislative di ghjugnu 2017, pè a prima circuscrizzione di Cismonte. Hà fattu sapè ch’ellu hà dumandatu l’investitura di u partitu “En Marche”. A listessa dumanda hè stata indirizzata da Julien Morganti, vicipresidente di a Cumunità d’Aglumerazione di Bastia. A u mese d’aprile, una cumissione d’investitura ferà sapè quale hè statu sceltu.


François Fillon in Corsica u primu d'aprile
2017-03-23 09:52:28

U deputatu Camille de Rocca Serra hà annunziatu chì François Fillon serà in Corsica u primu d’aprile pè a campagna à l’elezzione presidenziale. Duie reunione publiche sò previste in Biguglia è Aiacciu.


Chargement en cours...