Corsica Cristiana : chì avvene ?

U puntu di vista di : Gaston Pietri
Da u 30 ghjugnu, à u 4 lugliu di u 2001 s'hè tenutu in Corti un cullocchiu d'una grande qualità nant'à u tema " Corsica Cristiana ". A vigiglia di l'apertura di stu cullocciu, à u museu di Corti, hè stata inaugurata una rimarchevule espusizione chì cumprende più di 200 opere, chì testimunieghjanu di l'eredità critiana di a Corsica. A filosufia di st'iniziativa passiunante hè quella di a Corsica decisa più chè mai à ricunnosce i sò eredi. Ùn hè micca ben intesu a Corsica chì averrebbi fattu marchja in daretu, s'ellu ci vulia à redige u statutu di i diritti fundamentali, dinanzu à a mentione di sta "lascita religiosa" chì avia stunatu u Guvernu francese à u mumentu di a redazzione di u statutu europeu. Ghjè stu passatu ghjustappuntu chì face ciò chè no simu. Di stu passatu, nè simu liberi di fanne ciò chè noi nè vulimu. Si pone a quistione inevitabile : chì avvene ?
Ùn pudimu lascià à i soli muesi e vistighe di u nostru passatu. I participanti à u cullocchiu " Corsica Cristiana " anu manifestatu, in una muzione, a vuluntà di megliurà e cundizioni di cunservazione, di prutezzione è di messa in valore di stu riccu patrimoniu. E minaccie sò stali chì ci vulia à dì à alta voce quantu serrebbi gravissimu, a deteriurazione, è a dilapidazione.

U nostru raportu cù a storia
Ci vole à sapè chì a nostra epica, in Corsica cum'è in altrò hè sottuposta da a tentazione di venerà sempre più, à traversu i musei, un passatu ch'ella ùn ricunnosce più. Ghjè u nostru raportu cù a Storia chì hè in causa.

A Corsica hè stata cristiana o nò ?
Ben intesu ci vole à risponde di sì, tantu a simbiosi hè stretta trà a chjesa è a sucietà. E testimunianze sò numerose i custumi chì stu passatu ci hà l'asciatu portanu l'impronte evidente d'un mischju - chì a storia di u Mediterraniu spiega benissimu - d'autentica fede cristiana è di qualchì remanente indeniabile d'una religiosità pagana. Ghjè difficile di risponde, si l'usi è i custumi eranu prufundamente cristiani ? Ciò chì ghjè sicura hè chì a mente cullettiva ùn sfughjiva micca u ghjudicamentu di u Vangellu. In u 1848 u vescu Xavier-Raphaël Casanelli-D'Istria cunsacrava una lettera pasturale à a dramatica situazione di a vindetta, ùn esitava à dinunzià " e vindette private susistuite à a vindetta publica ", mandò à i so cumpatriotti corsi a chjama urgente di Paulu à i Cristiani di e prime cummunità : " ùn ti lascià mai vince da u male, ma sie vincitore di u male da u bè ! ". Parechje croci sò erette à l'entre di i paesi cum'è Linguizetta, Guagnu, Calcatoghju, è d'altri, chì testimunieghjanu di e ricunciliazioni publiche intervenute s'annate custì, à u termine di missioni paruchjale.

A chjesa à mezu paese
A Corsica ghjè cristiana o nò?
Quì, esitu à risponde pusitivamente, per via chì a quistione hè posta à u prisente. Ghjè ciò chì ogni Corsu s'hà d'esperienza, hè impussibile quì di fà astrazzione, qualessa sia l'opinione ch'ellu si prufessa, di l'impronte lasciate nant'à e manere d'esprimesi, nant'à l'organizazione stessa di u spaziu è di u tempu, da quindeci seculi di cristianisimu. U nostru paisaghju hè bella chè capita hè un paisaghju cristianu. Ancu, si in listessu tempu, ogni Corsu sà, s'ellu riflette nant'à e caratteritiche di a sucietà muderna, ch'ellu ùn hè più pussibile d'esse naturalmente cristianu per via di u ghjocu d'un'appartenanza à un'urigine. E giovane generazioni à ci facenu vede chjaramente ogni ghjornu. U stabilimentu-chjesa essendu à u centru di u paese. A Chjesa, à u sensu d'instituzione ecclesiale, ùn hè più à u centru di a vita suciale, di qualchì segnu di cunsiderazione chì sianu ufficialmente ingirati i rispunsevuli. Ùn hè micca à un sistemu religiosu chì a sucietà ricorre per truvà i simbuli è l'urigine di a so leghjitimità. In i paesi d'Occidente, stu fenomenu si chjama a secularizazione. In ellu stessu stu cuntestu ùn hè micca una catastrofa. Vatanicu II hà ricunnisciutu una " ghjusta autonomia di e realità terrestre ". Ghjè nant'à d'altre strade chì anticamente, una sucietà pò riscuntrà u spiritu di u Vangellu. Nunda hè persu. Nè menu à vuluntà d'evangelizà di novu. O ancu a necessità d'evangelizà rialaccendu un raportu vivu cù u passatu, tantu hè vera ciò ch'ellu dice Paul Valéry : " la véritable tradition dans les grandes choses, c'est de retrouver l'esprit qui a fait ces choses mais en ferait d'autres en d'autres temps ". Ùn bastarrebbi di ritene cum'è indicatore di vitalità cristiana, i soli chiffri di a pratica religiosa, vale à dì a frequentazione regulare di l'assemblea liturgiche. U cunstattu ci scuragiscerrebbi. A frequentazione di i zitelli à u catechisimu, ci facenu vede una prupurzione d'omi è di donne chì diventati adulti seranu senza iniziazione cristiana. In listessu tempu, d'altri segni indicanu un'attesa. U pelegrinagiu di i giovani Corsi à Assise, à u mese di lugliu scorsu, hè statu un successu, allora chì a prupurzione di l'elevi di secondu ciclu (da a seconda à a terminale) chì frequentanu tuttu l'annu i scontri di cappellaneria sculare hè insignifichente. Cunversazioni fattesi fora da a chjesa intendenu aspirazioni etiche è religiose chì nunda al di fora ùn lascia suppone. Bisogna à fà un sforzu d'imaginazione chì ci cunducerrebbi versu d'altre strade. A cunservazione - à suppone ch'ella sia pussibile - ci purterrebbi, à un contrasensu.

In cerca di radiche
À un'epica duve l'evuluzioni crescenu à una vitezza sprupusitata, è nurmale vistu a mudernità, di circà e so radiche. Ghjè tandu chì a Chjesa si vede assegnà a tacca di guardiana di e tradizioni. Una Chjesa chì ùn averrebi cunsiderazioni chè per via di " l'utilità suciale ", risicheghja di dà di Diu a falsa imagine d'un Diu utile. E ancu un'utilità appreziata à l'una di e preferenze ch'elle sianu sentimentali, o socio-pulitiche. Pattu à offende, ci vole à dì chì Diu ùn face micca parte di l'ordine di l'utile. À valore in sè. Stu messagiu tale chì Cristu l'à incarnatu, hà ben intesu un'impattu suciale. Cristiani, credimu chì st'ultime sò umanizante. Ùn pudimu avè per scopu di guarantì per e vie di stu messagiu qualchì intrapresa ch'ella sia, suciale, culturale, identitaria. Appartene à l'omu di l'ucalizanne à fecundità. L'anziani à modu soiu n'anu fattu u sperimentu. À noi altri di reinizialla à contu nostru. Serrebbi à sola manera di lasciacci inspirà lealemente da i nostri quindeci anni di cristianisimu.

A Corsica terra di fede
Dui mila anni di cristianismu in Corsica sò dinù dui mila anni di storia d'un isula, è di e so cumunità, à traversu a religione senza discuntinutà, senza schisimi, nè eresie. Una religione stampa in ogni individuu di sta terra, ch'ellu sia credente o nò. Una religione prisente in u paisagiu, in e cità, in i paesi, nant'à e strade, in i cimiterii, è in ogni casa. Pè a prima volta grazia à l'espusizione urganizata da u museu di Corti, a Corsica ramenta sti vinti seculi di storia, impastata di religione cristiana à traversu duie centu opere uriginale, chì pruvenenu principalmente da e chjese di l'isula, ma dinù da musei francesi è strangeri.
Parochje, cunfraterne, è campanile tanti ornanenti in u paisagiu di i paesi, di e ville ; croci, cappelle, custruzzioni edificate u longu di e strade di a muntagnera. U tempu d'un sguardu, d'una meditazione. Ghjè ben intesu à l'arte sacru ch'omu deve ste realizazioni artichetturale è artistiche è più dilicate. U paisagiu, ch'ellu sia quellu di a cità, o quellu di u paese porta l'impronte di a prisenza di a chjesa. St'iniziativa riveste un caratteru ecceziunale, per via di a qualità è di e numerose opere esposte. L'urganizatori anu fattu una selezzione minuziosa di l'ogetti di u patrimoniu di e chjese, di i cunventi, di l'oratorii, ancu in a Cità di u Vaticanu, di u Statu talianu, di u Museu di u Louvre, di Brescia, di i Musei Granet d' Ecchsi in Pruvenza di l'Annunziada à Saint Tropez, è ben intesu di u Musesu di a Corsica in Corti. Un parcorsu cronologicu, urganizatu in trè periode mette in valore a richezza di stù patrimoniu religiosu, artichetturale è artisticu : " A Corsica à u core di u primu cristianismu méditerranenu " ; " A Corsica puntificale, Pisa è Genuva " ; " A Corsica in a Francia ". I ducumenti paleocristiani occupanu una piazza impurtante grazia à e principale scuperte nant'à i siti di Sagone è di Mariana (musaiche, sculture, ogetti in ossu, lampane à oliu…), duve i veschi catolichi, esiliati da i rè Vandali, avianu stabilitu versu u Vesimu seculu i primi abitaculi cristiani, rimpazzati à u XIIesimu seculu da magnifiche chjese rumane d'un'architettura à influenza lumbarda è tuscana.
A fine di u Medievu, è u principiu di l'epuca muderna vedenu afflue un'abbundanza di decori è d'ogetti di devuzione in i lochi di cultu. Sculture nant'à marmaru, è avoriu (cum'è u crucifissu di Calvi), venuti d'Italia pè i più ricchi santuarii, pitture à l'affrescu chì coprenu l'asside d'una decina di cappelle in Corsica Suprana, cum'è quella di Santa Maria Assunta in u Boziu. Ste pitture testimunieghjanu d'un intensa attività religiosa è artistica, esempiu a preziosa Vergine à a chjarasgia, attribuuta à Sano di Pietro, cunservata à u Museu d'Aleria hè chì appartene à u cunventu d'Alisgiani. À u XVesimu seculu e relazioni strette chì si sò stabilite trà l'artisti, in favore di i grandi attelli è e cumande favulose, tuttu què face ch'ellu hè difficiule d'attribuì un'urigine stilistica precisa di l'opere pinte. A cunfluenza di i grandi centri artistichi, a Scola corsa di l'epuca strana apprisce, mischjata d'influenze è di sperienze. Pittori corsi anu frequentatu artisti venuti da diversi orizonti, principalmente quelli di l'Italia, ma dinù francesi. Una multitudine di statue pupuleghjanu e chjese di a Corsica scelte frà i principali temi iconografichi, rendenu contu di a diversità, è di l'interessu di ste sculture, attribuite à attelli o maestri cunnisciuti, particularmente taliani. Certe sculture in marmaru, d'urigine taliana sò a scopre : u magnificu tabernaculu di Santa Maria Magiore di Bunifaziu (1465), u suntuosu tumbinu di u vescu Agostino Saluzzi in Lavasina (1744), u battezimu di Ghjesù Cristu, di u XVIIesimu seculu di a catedrale di Bastia. L'elementu uriginale di a statuaria religiosa di l'isula sò e statue poste nant'à i cataletti purtati in prucessiò. Opere d'un'espressività smisurata, è di grande qualità, chì mette in evidenza l'intensità dramatica. Cuncepite per illustrà cù forza l'esteriurizazione di u sentimentu religiosu in e ceremonie cullettive. A traversu i seculi l'orificeria sacra scambia, non soladimente di stile ma dinù in e topolugie di i diffenti ogetti, chì cù u tempu s'adattanu à i novi riti. In quant'à l'ex-voto, cumuventi è spetaculari, custituiscenu testimunianze uniche di a fede pupulare, è di u cultura marittima.
Infine, l'espusizione mette in valore a richezza di u patrimoniu religiosu corsu, aspessu scunnisciutu, chì hà marcatu a Corsica di e so impronte. Durante seculi, u cristianismu hà avutu un'influenza nant'à è mentalità, a vita publica è suciale, e pratiche culturale, è a creazione musicale.