Canzone di ciò chì si passa

Ghjuvan Ghjaseppiu FRANCHI

Editions L'Ammaniti

Ghjuvan Ghjaseppiu FRANCHI si sà ch'ellu hè unu di i scrittori maiò di quilli di u sittanta. Urganizatori d'associ di a spalluzzera in Tilò, hè statu, dopu vultatu indi l'isula, cuurdinatori accademicu pà u insignamentu di u corsu.

Par ciò chi tocca à a literatura, hè statu prisenti, da u 1974 à u 1990 (da u sicondu numaru à l'ultimu sciutu, u 26) ind'a rivista Rigiru, locu di sprissioni maiò di issa leva literaria. Ni fù ellu u dirittori di publicazioni da 1'82 à u 90.

Traduttori, hà datu a prova ch'ella avia a lingua corsa a capacità di sprima qualsiasi idea o tema. U so travagliu più cunnisciutu in issu duminiu hè Knock dettu in corsu, publicatu da u C.R.D.P. di a Corsica.

Prusatori, hà cercu ind' i nuvelli di a racolta Isulitudine una forma muderna di a sprissioni corsa. Hà publicatu ancu studii tematichi svariati in libri cullittivi o rivisti. Si tratta tandu pà u più di "radiuscupii" di a menti corsa sottu à i figuri incuscenti ch'ella carrea a lingua o ch'ellu inghjenna u discorsu.

Ci voli à mintuvà dinò a so opara pidagogica cù i trè vulumi di a siria literatura corsa, primiati ind'u cuncorsu pà a pruduzzioni di ducumenti pidagogichi, è spachjati in tutti i licei ad usu di i scoli di siconda, prima è tarminali.

Ma fù prima a so puisia à fà lu cunnoscia. I so puemi, chi ùn si pudianu truvà cà ind'i numari vechji di Rigiru - è chi certi funu cantati ma publicati micca - ed agruppati qui ind'un libru solu. Voli risponda issu libru à dui bisogni : prima quillu di u publicu chi u corsu u leghji pà u so piacè è chi ci truvarà una puisia diversa assai pà i temi è chi ùn si pò cunfonda cù varuna. Par quilli chi pudarianu avè i dificuitai di capiscitura, hè aghjunta, ma dopu da ch'ellu sia lettu prima u corsu, una traduzzioni in francesi, senza ricerca di qualitai literaria, ma ghjuvativa da ch'ellu si capischi u significatu di i testi.

U sicondu bisognu hè pidagogicu : sogna à pinsà à a mancanza di testi da studià in facultà o indi l'ultimi scoli di i licei. Par issu publicu scularu è univirsitariu, è pà i insignanti chi u formanu, ci sò i spiicazioni è i dumandi chi i pudaranu aiutà.

ALTRE OPARE DI L'AUTORE

E fole di mamma (fole tradiziunale), Éd. Cyrnos et Méditerranée, Aiacciu, 1982.
Lessicu di a psicanalise, ADECEC, cull. " Lingua è tecnica ", Cervioni.
Knock dettu in corsu (traduzzione adattata di l'opara di J. ROMAIN), CRDP, Aiacciu, 1988.
Isulitudine (nuvelle bislingue), Éd. La Marge, Aiacciu, 1992.
Literatura corsa 1 : Forme è primure di a puesia d òghje (libru di scola), CRDP, Aiacciu, 1991.
Literatura corsa 2 : Prosa d òghje (libru di scola), CRDP, Aiacciu. 1998
Literatura corsa 3 : Puntelli di gramatica (libru di Scola), CRDP, Aiacciu. 2000