U PRIMU DIZZIUNARIU FRANCESE-CORSU
PER I ZITELLI

Stu picculu dizziunariu, chì si presenta sott'à a forma d'un fiuraghju, permetterà à i zitelli di famigliarizzassi cù 1 000 parulle è spressione di a lingua corsa, senza scurdà di divèrtesi.

Lucia Memmi, capu di stabilimentu sculare, ha participatu à l'elaborazione di libri pedagogichi in a squadra di u Finusellu, Lucia Santucci, autore, inspetrice di l'educazione naziunale è Marie-Paule Cadieu, psicologa, interessata da l'amparera di e lingue regiunale da i zitelli, sò l'attori maiò di stu dizziunariu.

U prifaziu hè statu realizatu da Ghjuvan-Maria Arrighi, inspettore regiunale di lingua è cultura corse.

L'illustrazione sò di Christophe Lazé. Dapoi l'età di 18 anni, ha fattu parechji ritratti, carchi di puesia.

U fiuraghju custituisce una prima tappa per tutti i zitelli chì averanu un cuntattu piacèvule cù stu saltere.

Puderanu acquistà in furia un vocabulariu di basa, chì sarà svilluppatu dopu, in u quadru d'un amparera più sistemàtica di a lingua.

U corsu s'affirma pocu à pocu in tantu chi lingua. Stu dizziunariu hè una finestra aperta annant'à tuttu ciò chì sprima a vita umana è d'ogni ghjornu di i Corsi.

I zitelli ùn hanu più ch'à leghje, girà e pàgine è amparà e spressione currente d'una lingua incantata !

" Mon premier dictionnaire Français-Corse " hè esciutu à l'edizione Jean-Paul Gisserot.

In u prefaziu di Ghjuvan-Maria Arrighi, fatta in francese, i zitelli puderanu scopre l'origine di a nostra lingua, cù una spiegazione di e base latine è a piazza maiò di e parechje invazione. Arrighi tratta di l'evoluzione di l'insignamentu di u Corsu in scola, di e particularità di a lingua, di cultura è di litteratura.

Per tutte e lettere di u saltere, i zitelli ponu vede l'illustrazione accumpagnate di a parulla in duie lingue (Francese è Corsu). Quand'elli si sò famigliarizzati cù u saltere, i zitelli cumminscieranu à scopre e spressione e più cummune di a lingua nustrale (salute, avvedeci, à dumane, à prestu, bona notte…).

Ma l'affare ùn si compie ancu, ci ferma a amparà e parulle di sughjetti assai diversi chì sò i nùmeri, a persona umana, i panni, i culori, e forme, u tempu, i cuntrari, a famiglia, e pezze di a casa, a cucina, i ripasti, i frutti, i legumi i fiori, l'animali, a cità, e strette è i cummerci.

È per compie sta prima tappa d'amparera, una lettura hè proposta in fine di libru, ghjè una fola di Ghjuvan Ghjaseppu Franchi : " U Boie Milellu ".

Una bella iniziativa per i zitelli, perchè cum'è si sà, ghjè u mumentu u più favurèvule per l'amparera di e lingue, sopr'à tuttu quandu si parla di lingua materna.