Ghjera in u mese di ferraghju 1998, qualchi ghjorni dopu l'assassiniu di u prefettu Erignac. Fabienne Maestracci, interpellata in u stessu tempu chì u so cumpagnu, Marcellu Lorenzoni, ricusava di denunzià quellu chì spartìa a so vita. Facìa allora a cunniscenza di u mondu chjosu di Fleury-Merogis, sezzione di i terruristi, perchè i prigiuneri pulitichi ùn esistenu più, ufficialmente, in Francia. Ci starà 13 mesi.
Dui anni dopu a so esciuta, ci presenta un libru angusciosu.
Un racontu di u mondu carcerale in una prigione di donne o " imprigiunate provisorie " è cundannate.
Ste 165 pagine, Les murs de vos prisons, esciutu à l'edizione Albiana, ci facenu ciuttà in un mondu chì, da u fora, pocu mondu pò imaginà.
Prussimità è solitùdine, inghjulia d'ogni ghjornu, malatìe di carenza o per vìa di mancanza d'igiena generale, contr'à i quali ci vole à luttà sempre. Tuttu què face ci e personne si custruiscenu una còppula d'indifferenza…
È malgratu tuttu, in stu mondu grisgiu, qualche luce di sperenza…
Un gestu di solidarità, un'attività chì face evàdesi u spiritu, un cantu chì s'alza, un curcone d'anniversariu chì s'apprunta cù i mezi di u bordu, rittaccanu a prigiunera à a cummunità di l'umani.
Quelli chì, un ghjornu, hanu tastatu à a cucina di Fabienne Maestracci ùn ponu dubità un mumentu ch'ella hè un'artista autentica.
Stu secondu libru hè una cunfirmazione : hè dinù un scrittore.
Malgratu a curazza ch'ella sèhè fatta per sorte intatta mentalmente di 13 mesi di detenzione, trova tesori di sensibilità per evucà un mumentu tristu o ridìculu, per fà un ritrattu più veru chì natura di e so cumpagne di prigiò.
À a fine di u libru, aspettemu cù una certa impacienza, u so terzu libru…