|
|
||
| ||
|
26/04/2006
« OR PROVU » DI STEFANU PERGOLA  Stu libru hè a prima racolta puetica di Stefanu Pergola, 25 anni, prufessore di corsu à u liceu privatu Jeanne d'Arc di Bastia. I temi trattanu di a passione, quella di l'amore, di a lingua corsa, di l'anziani. Un'opera editata per mezu di l'associu « Matina Latina » di Rinatu Coti, di l'edizioni Cismonte è Pumonti di Ghjuvan Petru Graziani è di un aiutu di a CTC. Ghjè u primu libru d'una cullezzione chì vole fà cunnosce giovani autori in lingua corsa. « …Pueta di a passioni, di l'amori, à quandu aspru, à quandu dolci (Solu per i to ochji), sirenu o timpistosu (Iè chì, Ghjelusia), di i batticori accurdati (U culore di u m'amore, Ellu è Ella), di u Curdogliu (Ma ricordati di mè, Rummaricu), di u culori purpurinu è carminu chì tigni i labri è i maschetti di l'innamurati, di i peni d'amori è di i lacrimi (L'avia tantu sunniatu, Tandu, Un passu in davanti). L'amori di a Corsica (A mo passione, Stefanu, A lingua, E mo filicaghje) è di a so ghjenti diversa (È s'è ùn era). Ma si ni stà attenti à i muchi di i tempi nosci (Forse chì dumane, Settimana, A Muraglia di China, U zitellu infuttuliatu, Sottu à u listessu sole). Eppo trè puema umaghji à Victor Hugo, scritti in u 2002, pà u bicentinariu di a nascita di u gran pueta. Com'è ind'è Hugo, vi n'accurdareti chì suventi u mari è u battellu, figuri mitaforichi, voltani in a puisia di Stefanu (Odissea, Mare, Mare d'argentu), ci dicini di u tempu chì voca è di l'eternità… » Marceddu Jureczek 6 marzu 2005 Riferenza in l'archivie ADECEC: A - PRE 25.04.06 PER+JUR
|