11/01/2008

 

CULLOCCHIU PASQUALE PAOLI IN GENÈVE

E cumemurazioni di i 200 anni di a morte di Pasquale Paoli si sò compie in Genève cù un cullocchiu urganizatu da a facultà di dirittu di sta cità è u cunsigliu generale di Cismonte nant’à u tema « Paoli, a rivuluzione corsa è i Lumi », un temu sceltu da u prufessore Victor Monnier. À principiu, u presidente Paulu Giacobbi hà fattu un umagiu sentitu à u so cullegu è amicu Claude Olivesi, mortu à principiu di l’estate 2007 è chì avia cunsacratu unepochi di i so travagli universitari à l’omu di Merusaglia.

In Genève, qualchì cuntribuzione hà permessu à i participanti di dibatte è di scambià nant’à u Generale. In Svizzera, cunsidereghjanu ch’ellu hè unu di i babbi fundatori di u custituziunalismu mudernu. Sò intervenuti, frà altri, i prufessori Alfred Dufour ("J. J. Rousseau et l'indépendance corse: la Corse, la Suisse et Genève vues des Montagnes neuchâteloises"), Giovanni Busino ("Paoli dans l'historiographie italienne moderne"), Carlo Bitossi ("Libertas" genovese e libertà dei corsi: i fondamenti ideali di una repubblica di antico regime di fronte alla rivoluzione corsa"), Michel Vergé-Franceschi ("Paoli et la franc-maçonnerie européenne au XVIIIème siècle") eppo Antoine-Marie Graziani, specialistu di Pasquale Paoli. Hà paragunatu rivuluzioni corsa è americana. D’altrò, François Quastana, maestru di cunferenze à l’università d’Ecchisi-Marseglia III, s’hè pruvatu à rileghje l’opera pulitica è custituziunale di Paoli.

À capu di stu cullocchiu, ognunu hà ricunnisciutu a dimensione universale di Paoli è a necessità di cuntinuà à fà campà u missaghju umanistu di u paolismu.

Riferenza in l'archivii ADECEC: A – CM 05.01.08

 

 

Rivene à a pagina d'infurmazioni