04/02/2008

 

A FILETTA Hà 30 ANNI

Dopu 30 anni di vita, sta Filetta ùn hà persu a so putenza creatrice è arrigistreghja u so dodecesimu dischettu à l'auditoriu di Pigna. Un’opera chì addunisce creazioni mai arrigistrate, mostra u percorsu di u gruppu è si chjamerà Bracanà, una parolla avendu parechji sensi chì face pensà à culori in armunia o à un fruttu quasi maturu. Accant’à Jean-Claude Acquaviva, avemu à Jean Sicurani, u secondu membru fundatore, José Filippi ghjuntu in u 1983, Paul Giansily l'annu dopu, Maxime Vuillamier in u 1989, Jean-Luc Geronimi 11 anni fà è l’ultimu, François Acquaviva, u nipote di Jean-Claude.

In u 2007, A Filetta hà giratu parechji cuntinenti. L’annu 2008 principia cù Bracanà è si finiscerà cù l'arrigistramentu di « Di Corsica riposu », stu « Requiem pour deux regards » creatu senza accumpagnamentu musicale à u festivale di Saint-Denis. In u calendariu, averemu dinù un opera per i zitelli creatu cù dui cumpagni storichi, Bruno Coulais è Orlando Forioso, eppo un ballettu, « Apocrifu », cù una curegrafia di Sidi Larbi Cherkaoui, ballata à u Théâtre de la Monnaie in Bruxelles. In a dimarchja d'A Filetta a tradizione corsa hà un sensu s’ella campa in leia cù e tradizioni d'altrò.

Riferenza in l'archivii ADECEC: A – CM 02.02.08 RAF

 

 

Rivene à a pagina d'infurmazioni