|
|
||
| ||
|
25/02/2008
FESTIVALE CULTURALE DI FURIANI
Ghjè a terza edizione di u festivale culturale di Furiani, da u 4 à l’8 di marzu, à u cinema 7ème art. Pè l’urganizadore Alix Ferraris, « sta terza edizione prupone un altru sguardu nant’à l’universu culturale di a Corsica è presenta talenti artistichi da scopre o da ritruvà. In u 2008, u Festivale hè u primu di quattru altri festivali pluridisciplinari cù sculture, pitture, opere litterarie, teatru, musica è filmucci, pè u più corsi. » U 4 di marzu, i sculari scuntreranu à Gabriel Diana chì campa in U Borgu è chì zucca opere sposte in u mondu sanu. In u 2004, hà ricevutu da u presidente di l’Italia, u Cavalierato della Republica. U 5, serà inaugurata a mostra di pitture di Linda Calderon è e tele di i so studianti. Di sera, u cuncertu di Voce Ventu. U 6, hà da esse una ghjurnata speciale cunsacrata à a famosa canterina Barbara cù e cunferenze di u so anzianu cullaburadore Jean-François Fontana è di Valérie Lehoux, giurnalista à Télérama, eppo serà La Grande Sophie chì mustrerà a mudernità di e canzone di Barbara. U lindumane, u caffè litterariu animatu da Christophe di Caro induve rumanzeri, autori dramatichi, filosofi è editori presenteranu e so opere è discurreranu di e so mutivazioni è di cultura cù u publicu. Infine, l’8 di marzu, i cuncerti di Sékli è di Joséphine. Biglietteria à a merria di Furiani : 04 95 30 79 70 o à Merca music distribution, RN 193, immeuble Seddas, Furiani : 04 95 58 84 13. Riferenza in l'archivii ADECEC: A – Informateur Corse 22.02.08 NIC
|
