|
|
||
| ||
|
28/02/2008
RINASCITA DI A SUCIETÀ ARCHEOLOGICA DI U CENTRU DI CORSICA
Hè rinvivita a sucietà archeologica di u centru di Corsica, chì era stata fundata durante l’anni settanta da parechji passiunati cum’è Lucien Acquaviva è Jean-Charles Antolini. Dapoi u 21 di ferraghju di u 2008, un novu scagnu hè statu messu in piazza è i prugetti ùn mancanu, per esempiu nant’à u museu d’Albertacce. Cum’è trent’anni fà, « ci vole à dà un quadru ghjuridicu à l’attività liate à i scavi in Niolu è à u funziunamentu di u museu ». Cusì dice Jean-Philippe Antolini, membru di a sucietà è duttore in archeolugia à l’università di Corsica. In stu museu chjamatu museu Lucien Acquaviva, mortu di nuvembre 2007, avemu punte di frezze è elementi litichi è ceramichi interessanti, belle stantare, per esempiu San Ghjuvan Battista III. U museu serà dinù rinnuvatu, a museugrafia serà rifatta pè fà vene regularmente sculari è studianti. A cullezzione averebbe da arricchissi d’altre scuperte fatte da Jean-Philippe Antolini. Dapoi trè anni, s’interessa à u situ di a cumuna di Calacuccia, pare ch’ellu hè statu occupatu dapoi a fine di u neoliticu. Sì vo vulite sapenne di più nant’à a sucietà archeologica di u centru di Corsica, cunsultate puru u situ http://museeniolu.spaces.live.com Riferenza in l'archivii ADECEC: A – CM 25.02.08 PIS
|
