15/03/2008

 

SETTIMANA DI A STAMPA IN SCOLA

Pè u 19u annu cunsegutivu, l'accademia di Corsica participeghja à a settimana di a stampa è di i media in scola chì si ferà da u 17 à u 22 di marzu. In l'edizione 2008, 52 stabilimenti ci cullabureghjanu. U rettore di Corsica, Michel Barat, hà presentatu sta settimana è u so tema : « Une info, des médias ». Cusì, l’elevi seranu aiutati pè capì u sistemu di i media : « Si tratta d’educalli à a lettura è à l'analisi critica di i puntelli d’infurmazione, di piglià cuscenza di a so piazza è di a so influenza in a sucietà. Ghjè un insignamentu à longu andà chì permette d’appruntà l'avvene. »

In più, sette stabilimenti participeghjanu in particulare à u cuncorsu naziunale Varenne grazia à i giurnali sculari fatti da l’elevi. U giurnale isulanu chì serà premiatu, u 4 d’aprile in l'accademia, hà da esse speditu à a ghjuria naziunale è puderà forse vince 15 000 €. Altre attività sò previste dinù da u 17 à u 22 di marzu. À u prugramma : a visita di studiò d'arrigistramentu è di sale di stampa, dibattiti cù i giurnalisti, riporti è redazzione d'articuli... Dunque, una bella manera pè i giovani d'esse in leia cù l'attualità, e rete di l'infurmazione è i prufessiunali di a cumunicazione.

Riferenza in l'archivii ADECEC: A – CM 14.03.08 P.C.

 

 

Rivene à a pagina d'infurmazioni